Dia 1 di juni ta e fecha limite cu gobierno a stipula cu tur scol habri bek.

A pesar cu nan ta trahando pa scolnan por habri bek brindando tur siguridad di higiena pa nan docente- y studiantenan, tin scol cu tin su retonan debi na nan infrastructura deteriora pa nan por cumpli cu tur e pre-rekisitonan di DVG, ya cu nan edificio no ta adecua.

Minister Presidente, Evelyn Wever-Croes a yega di informa cu reunionnan ta bin tumando luga cu directiva di e diferente scol. E tipo di reunion aki ta bayendo den un bon direccion y mayoria di scol tin pensa di habri entre 25 di mei pa 1 di juni.

“Pa 1 di juni nos ta bay mira cu mayoria di scol lo ta habriendo,” el a bisa.

Tur e apertura riba tereno di enseñansa ta tuma luga cu protocolnan stipula pa DVG. Pero sigur e ambiente di scol no ta bay ta mescos cu antes, ya cu mester tin protocol cu mester cumpli cune. Cada scol lo informa e mayornan tambe riba nan.

Den esaki nan ta poniendo extra atencion riba loke nan ta yama ‘gruponan di riesgo’. Nan ta docente y studiante cu por ta confronta cualkier problema di salud of otro circunstancia cu mester tene cuenta cune.

Control di DVG.
Pa loke ta e parti di control pa determina si e scolnan ta acto pa ricibi su personal bek, Sharline Koolman di DVG a declara cu durante e tipo di reunion aki cu ta tumando luga riba dialuna, nan ta wordo informa di cualkier situacion, ya cu nan ta forma parti di e deliberacion aki.

Den e tipo di reunion aki tur e puntonan di pre-rekisitonan di DVG pa cada scol por habri bek, ta wordo discuti. Y si den caso, mester bay controla, DVG ta haci e trabao aki tambe.

Koolman a laga sa cu e tipo di reunion ta bayendo bon y hopi profesional. DVG ta conta cu e directiva di cada scol ta dunando tur informacion manera debe ser. Te aworaki nan no ta mira niun problema pa nan por cumpli cu nan rekisitonan exigi pa nan por habri bek.

 

LEAVE A REPLY

Please enter your comment!
Please enter your name here