Mayoria pashentnan di afo cu ta bay Medellin ta di Aruba

E ciudad Colombia di Medellin ta masha conoci na Aruba, como uno bon pa asuntonan di salud. Cifranan di 2016 ta mustra cu mayoria di pashentnan di afo ta bin for di Aruba.

 For di decada di añanan 70,  ya caba nos hendenan tabata biaha pa Medellin haciendo uzo di e compania aereo Aero Condor pa realisa nan control medico. 50 aña despues, ainda Medellin ta un ciudad cu ta wordo caracterisa no solamente pa su turismo di negoshi, sino pa su turismo medico of di salud. Na 2016 su crecemento den e sector aki tabata di un 56% cu un total di 11.703 pashent cu a nifica un cifra di mas cu 153 mil miyon peso Colombiano.

Pashent di afo
Di e total di pashentnan cu Medellin ta ricibi di afo, y muy particularmente di nos region Caribeño, Aruba hunto cu demas islanan di Reino Hulandes tin un porcentahe importante di pashentnan. Ta asina cu e presencia di pashentnan internacional na Medellin a nifica 3418 miyon dollar na 2010. Na aña 2016 e cifra aki a subi cu un 13% cu un total di 29.378 miyon dollar. Ta wordo calcula cu cada pashent di afo cu ta bishita Medellin pa turismo di salud ta gasta un promedio di 3.4 miyon di peso Colombiano alrededor di 2 mil florin.

Islanan di reino Hulandes
Den nan registro di pashentnan di afo ta aparece cu mayoria di nan ta bini for di Aruba, Corsou, Bonaire, St. Maarten, St. Eustatius y otro islanan di nos region. Na 2016 un 19% di e pashentnan cu a wordo atendi den institucion di salud (clinica y hospital) na Medellin a bini for di e islanan di reino Hulandes. Mientras cu un 17% a bini di Merca; 9% di Europa y 7% di Latino America mes.

E pashentnan di afo mas tanto ta bishita Medellin pa ayudo di diagnostico di salud buscando un segundo opinion. Tambe nan ta biaha pa servicio di oftalmologia, medicina specialisa, cirugia plastico of estetico, medicina general, etc.. Na Medellin a wordo lanta un cluster di Medicina. E organisacion empresarial aki ta percura cu e institucionnan di salud por eleva e calidad y confiansa di nan servicio. Ademas nan ta bini cu retonan pa asina e institucionnan aki por ta bon ekipa cu ultimo tecnologia avansa riba tereno medico. Tambe capacitacion y up date di nan personal medico y di cuido.

.