Referendum Amc Unicon Br.jpg

E trahadonan di AMC Unicon su departamento encarga cu mantenemento/airco tin un sindicato nobo cu ta representa nan, STA.

 

Despues di un referendum cu a tuma luga na sede di Mediador di Gobierno, sindicato STA  a haya e mayoria exigi pa representa e trahadonan di e departamento specifico aki di e compania menciona. Sr. Pontilius a laga sa cu den e caso aki e sindicato mes a pidi e referendum pa e departamento aki encarga cu e parti di mantenemento.

 

Sr. Pontilius no sa cual tabata ta e ambiente laboral cu a conduci pa celebra e referendum aki. Pero el a aclaria cu na final no mester tin problema den un empresa pa trahadonan ta dicidi organisa su mes. “E ta un derecho, un libertad cu tin y un di e canal cu tin ta pa cu mediante un contracto colectivo cu ta regla pa ley, e laga su sindicato negosha e condicionnan di trabou cu ta un documento formal y firma di acuerdo cu ley den un periodo estableci,” Mediador di Gobierno a señala.

 

Representacion

E trahadonan aki tabatin un representacion sindical prome cu nan a dicidi pa vota na fabor di STA den e referendum di diahuebs ultimo. Oficina di Mediador di Gobierno a wordo informa y nan a haya e documento cu nan tabatin un asociacion di e trahadonan mes interno, y nan tabatin un acuerdo interno. Pero e grupo di trahadonan di mantenemento no tabata di acuerdo pa sigui cu e representacion aki y nan a busca un sindicato pa representa nan. Sr. Pontilius ta kere cu aworaki tur cos lo cana mas facil den sentido cu e dunado di trabou sa caba cu tin condicion di trabou preto riba blanco, y nan mester percura con nan lo atende cu esey awor.

 

Mediador di Gobierno, Sr. Anselmo Pontilius a declara cu e cantidad di trahadonan tabata 25, un 18 di nan tabatin derecho di voto, y tur 18 a bin den bloki y nan a vota unanimamente pa e sindicato STA. E orario pa celebra e referendum aki tabata te cu 4:30 di atardi, pero considerando cu tur e trahadonan a yega na e ora stipula di 3:30 atardi ya pa 4’or di atardi e referendum practicamente a yega cla. “Na momento cu tur hende t’ey bo por cera e referendum, aunke e ta pacta te cu 4’or y mey,” Sr. Pontilius a declara.

E sindicato STA a haya e mayoria di e trahadonan di e departamento di mantenemento den presencia di gerencia di AMC Unicon cu a wordo representa door di nan departamento di Personal. Mediador di Gobierno a laga sa cu -segun e norma cu ta conta pa e tipo di proceso aki- awor sindicato tin cu entrega su proposicion pa e trahadonan cu nan ta representa. For di akinan pa dilanti ambos parti lo por cuminsa un proceso di negociacion di un contracto colectivo (CAO).

 

LEAVE A REPLY

Please enter your comment!
Please enter your name here