E siman aki, mensahenan di voz cu beisbolista Curasoleño, Kenley Jansen a manda pa artista Arubano, Jonathan Thiel (conoci artisticamente como Jeon), den cual un persona, kende ta indica ta Jansen, ta insulta un otro persona, asumi di ta Jeon.

Recientemente den un entrevista cu medionan Curasoleño na comienso di siman, Jansen a expresa decepcion pa e trato ricibi di algun artista contrata den su compania, y a anuncia cu e ta retirando for di industria di celebridad. Entre e artistanan cu tabatin contract cune, ta Jeon mes.

Rumornan cu a circula riba rednan social a indica cu e problema tabata andando pa un tempo caba, pero a culmina cu kibramento di e relacion profesional entre Jansen y Jeon relaciona cu un fiesta cu tabata organisando pa tuma lugar na Hulanda, ‘Caya ta Papia.’ Segun rednan social, Jansen a sinti cu no tabata tene cuenta cu su opinion y e no tabata di acuerdo cu e manera con tabata organisando e fiesta. Segun Jansen, e concepto di e fiesta tabata un idea original di Jansen, y e no tabata di acuerdo pa haci e fiesta sin su permiso na Hulanda.

Reaccion Jeon
 Ayera den oranan di anochi, team di Jeon a comenta riba e situacion den un comunicado di prensa.

“Nos kier tuma e momento aki pa duna claridad riba e situacion lamentabel cu a surgi den publico entre Jeon y KJ74 Entertainment, di Kenley Jansen.”

Den e comunicado a splica cu na inicio di aña 2025, a yega un acuerdo entre Jeon y KJ74 pa un total di 10 show: 5 na Corsou y 5 na Hulanda (exclusivo). E termino di e contract tabata hopi cla: un 50% deposito pa cada pais, cu e resto pa paga prome cu cada show.

KJ74 a paga e 50% pa e shownan na Corsou, pero a pidi pa pospone e pago di e shownan na Hulanda, prome pa un luna, despues varios bes pa mas tempo. Basa riba e confiansa y e relacion profesional cu ya tabata existi, Jeon a mustra flexibilidad durante varios luna.

Despues di cinco luna sin pago y sin por tuma otro show exclusivo pa Hulanda, Jeon a indica cu esaki no tabata husto pa su carera y a tuma e decision pa retira su compromiso pa e shownan na Hulanda.

Lamentablemente, esaki a crea tension den e relacion cu KJ74. Ta compronde cu Kenley Jansen tambe a sinti su mes molestia, pero e realidad ta cu tabata existi un acuerdo y e no a cumpli cu e termino acorda.

Kier sigui cu comportacion respetuoso pa tur partido envolvi, pero tambe ta importante pa tin claridad riba e situacion. Jeon ta gradici pa e colaboracion cu KJ74 y ta desea pa mantene e respet mutuo, tur ora cu ta posibel.

Na final, Jeon no ta kere den violencia y semper y cuando a boga pa uni e islanan door di musica. Ta pidi pa tur hende keda trankil y na paz cu otro.

“Nos ta crea musica. No enemistad”. Un biaha mas, ta pidi disculpa na tur fanatico si e situacion aki por a causa un impasse durante e ultimo dianan.