E siman aki, corte di casacion, Hoge Raad na Hulanda, lo duna su veredicto final den e Caso Avestruz, un di e casonan di corupcion mas significativo den historia reciente di Aruba. Cu e decision aki, lo yega un momento decisivo den un proceso legal cu a dura varios aña y cu tabata tin un impacto grandi riba confiansa den gobernacion na Aruba.

Caso Avestruz ta un caso di acusacionnan serio di soborno, corupcion y mal uso di tereno di gobierno. Den juli 2024, Corte di apelacion na Aruba a haya varios sospechoso culpabel, incluyendo ex-minister di Infrastructura di AVP, Benny Sevinger, hunto cu otro funcionarionan. E condenanan tabata basa riba prueba cu mustra cu tereno publico a ser duna na forma indebido a cambio di contribucionnan politico, beneficio personal y otro tipo di fabor, por ehempel un gym, y fiesta pa e yiu muher di e ex-minister, Stephanie Sievinger, actual parlamentario pa AVP.

Segun e sentencia di Corte den apelacion, e accionnan menciona a atacha e principio di transparencia y integridad den servicio publico seriamente. E caso a resulta den condenanan mas halto cu den prome instancia, algo inusual pa Aruba, entre otro condena di prison y limitacionnan riba participacion politico pa esnan declara culpabel.

Despues di e veredicto di Corte di apelacion, e acusadonan a apela na Hoge Raad. Den e fase aki, Hoge Raad no ta revisa e hechonan mescos mas, sino ‘solamente’ si e proceso legal a ser sigui corectamente y si ley a ser aplica di manera husto. E acusadonan a bisa, entre otro, cu tabatin persecucion politico, un punto cu lo ser considera dentro di e evaluacion huridico di e corte mas halto.

E veredicto cu lo ser anuncia lo tin implicacionnan grandi, no solamente pa e personanan involucra, pero tambe pa e sistema democratico y e percepcion di husticia na Aruba. E decision lo duna mas claridad riba e maneho di casonan di corupcion y lo confirma e importancia di un estado di derecho fuerte y independiente.

E veredicto lo ta e ultimo stap tambe pa e ex minister Benny Sievinger, cu si e ser haya culpable, lo mester bay prison. E veredicto lo tin consecuencianan tambe pa su yiu, Stephanie Sievinger, cu a declara na multiple ocasion, cu su unico mision den politica ta pa representa e legado di su tata. Si Hoge Raad confirma locual Corte di apelacion a dicta, cu su tata ta un corupto criminal, ki legado e ta bay representa e ora?

Fraccion di MEP ta enfatisa cu transparencia, responsabilidad y integridad ta keda pilarnan esencial pa fortalecemento di confianza publico. Lamentablemente casonan di corupcion ta sucede ainda, pero importante. ta, pa no sconde esaki bou tapijt, manera e gobierno di AVP a haci. Ta importante pa mesora cu mira cosnan sali for di man, pa investiga, y entrega keho. Si mester, contra bo mesun hendenan. Asina MEP a goberna. Y ta asina so comunidad lo haya confiansa back den su gobierno.

Nota di redaccion: E articulo aki ta opinion di e autor y no ta representa opinion di Bon Dia Aruba.