Fraccion di MEP a renoba su yamado pa un reunion publico urgente tocante e propuesta di Rijkswet Houdbare Overheidsfinanciën Aruba (HOFA). Den un carta oficial, cu a ser compaña pa varios rappel, e parlamentarionan ta pidi pa Parlamento habri un debate publico pa determina si tin suficiente consenso nacional pa sigui cu e controversial Ley di Reino, cu ta toca temanan fundamental manera autonomia di Aruba, supervision financiero y e futuro relacion cu Reino Hulandes.

Un carta dirigi na presidente di Parlamento di Aruba, fecha 20 di maart 2026, y compaña pa varios varios rappel cu a ser manda riba 20 di april, 11 di mei, 25 di mei y 15 di juni, ta pidi pa un reunion publico den cual e parlamentario por determina nan posicion tocante Ley di Reino, HOFA. Segun e documento, e parlamentarionan ta argumenta cu e asunto ta trata preguntanan fundamental relaciona cu autonomia di Aruba y gobernacion financiero, y pa e motibo ey merece un discusion habri den Parlamento.

Den e carta, e parlamentarionan di fraccion di MEP ta indica cu desaroyonan reciente rond di e propuesta di HOFA, combina cu e debate publico cu a surgi, ta hacie necesario pa Parlamento debati publicamente si tin suficiente consenso tocante e legislacion proponi. Nan ta sostene ademas cu den un estado democratico constitucional, Parlamento mester desempeña un rol central ora decisionnan ta afecta e esencia di autonomia y politica financiero di e pais. E parlamentario ta pidi pa e asunto ser inclui den agenda di Parlamento mas lihe posible.

E peticion ta yega na un momento importante den e desaroyo di e propuesta di e Rijkswet HOFA. Mas tempran e aña aki, Conseho di Minister di Reino (Rijksministerraad) a aproba e siguiente paso den e proceso legislativo door di manda e propuesta di ley pa Conseho di Estado di Reino (Raad van State). E propuesta ta resultado di negociacionnan entre Aruba y Hulanda cu tin como meta establece un marco legal pa largo plaso pa finanzas publico sostenible y supervision financiero.

Durante e ultimo aña, e propuesta di HOFA a bira un di e temanan politico mas debati na Aruba. Esnan na fabor ta argumenta cu e legislacion ta ofrece un caminda pa logra finanzas publico sostenible, interes mas abao y un economia mas resistente na largo plaso. Esnan contra, sinembargo, a expresa preocupacion tocante e implicacionnan pa autonomia di Aruba y e grado den cual Parlamento di Aruba a ser involucra den e proceso.

Segun informacion publica pa Gobierno Hulandes, HOFA ta establece normanan financiero destina pa garantisa finanzas publico sostenible na Aruba. E normanan aki lo ser complementa cu e Landsverordening waarborging houdbare overheidsfinanciën (LAft) di Aruba. Tur dos instrumento legal ta basa riba recomendacionnan di Fondo Monetario Internacional (IMF) y tin como meta fomenta disciplina fiscal y sostenibilidad di debe na largo plaso.

Gobierno di Hulanda y Aruba a enfatisa repetidamente cu e marco proponi lo crea varios beneficio financiero pa Aruba. Esakinan ta inclui acceso na facilidad di financiamento Hulandes cu tasa di interes mas faborable, posibilidad pa refinancia parti di debe externo di Aruba y reduccion den costo di interes riba prestamonan cu Aruba a ricibi for di Hulanda durante pandemia di COVID-19. Gobierno a argumenta cu e placa cu ser gespaar door di pagonan di interes mas abao por ser reinverti den educacion, salud, infrastructura y desaroyo economico.

Prome minister Mike Eman anteriormente a describi e propuesta como un paso importante den direccion di stabilidad financiero y cooperacion mas fuerte den Reino. Secretario di Estado Hulandes pa Relacionnan di Reino, Eric van der Burg, igualmente a caracterisa e legislacion como parti di un esfuerso conhunto pa crea finanzas publico sostenible y aumenta e capacidad di Aruba pa inverti den su futuro.

A pesar di e garantianan ey, e propuesta a topa resistencia for di oposicion y diferente sector. Criticonan a argumenta cu Parlamento mester a ser involucra mas activamente durante etapanan anterior di negociacion y consulta. Algun representante di oposicion a cuestiona si e propuesta realmente por ser considera un Ley di Consenso di Reino si no tin un acuerdo politico amplio na Aruba mes.

E asunto di participacion parlamentario a bira un tema recurente den e debate. Fraccion di oposicion a sostene repetidamente cu Parlamento mester tin e oportunidad pa debati e legislacion publicamente prome cu Aruba sigui cu e siguiente pasonan den e proceso legislativo.

Preguntanan relaciona cu autonomia a ocupa un lugar central den e discusion publico. Oposicion ta sostene cu e marco proponi lo transferi demasiado influencia riba politica financiero di Aruba pa institucionnan na nivel di Reino. Nan ta señala specialmente disposicionnan cu ta trata mecanismo di supervision y e rol di Conseho di Minister di Reino den cierto asunto financiero.

Gobierno sinembargo ta rechasa e preocupacionnan aki. Recientemente Conseho di Estado di Reino a conclui cu e combinacion di e Ley di Reino y legislacion nacional di Aruba no ta mina e fundamento di autonomia di Aruba. Segun e organo, e areglo ta representa un marco temporal y consensual cu ta refleha responsabilidadnan comparti dentro di Reino.

E opinion di Conseho di Estado ta ser considera ampliamente como un desaroyo importante pasobra e ta aborda un di e criticanan principal presenta pa opositornan di e legislacion. Sinembargo, e organo consehero a recomenda pa algun aspecto di e propuesta ser aclaria mas ampliamente, incluyendo temanan relaciona cu asociacionnan publico-priva y acceso na facilidad di financiamento den futuro.

Na mesun momento, Gobierno di Aruba a intensifica su esfuersonan pa splica e propuesta na diferente sector di sociedad. Minister di Finanzas Geoffrey Wever a participa den un serie di sesion informativo publico cu organisacionnan empresarial, sindicato y gruponan comunitario. E reunionnan aki tin como obhetivo provee informacion factual y stimula un debate publico informa tocante tanto e Ley di Reino como e legislacion nacional acompañante.

Durante un di e reunionnan ey, el a enfatisa cu Aruba ta operando caba pa varios aña bao di formanan di supervision financiero na nivel di Reino mediante e marco temporal di supervision financiero introduci na 2015. Segun gobierno, HOFA lo reemplasa e areglo temporal actual cu un sistema mas structura y sostenible cu ta inclui mecanismonan pa eventualmente transferi responsabilidad na institucionnan local una bes cu metanan financiero acorda a ser alcansa.

Pa hopi, e debate rond di HOFA ta bay mas leu di reglanan tecnico fiscal. E ta toca preguntanan mas amplio tocante gobernacion, rindimento di cuenta, participacion democratico y e relacion entre Aruba y Reino Hulandes. E propuesta a surgi for di un proceso mas largo cu a cuminsa durante y despues di pandemia di COVID-19, ora Aruba a depende fuertemente riba asistencia financiero Hulandes pa enfrenta desafionan economico severo. Eventualmente, e discusionnan ey a evoluciona pa negociacionnan tocante supervision financiero na largo plaso y sostenibilidad di debe.

Mientras cu e proceso legislativo ta sigui su curso, atencion awor ta bay back na Parlamento. E peticion renoba di parlamentarionan di fraccion di MEP ta pone presion adicional pa determina si un debate publico lo ser programa. Un sesion asina lo brinda miembronan di Parlamento e oportunidad pa expresa claramente nan posicion tocante e propuesta y permiti pueblo sigui e discusion den un contexto oficial.