(Infobae) – Merca a anuncia diabierna sancion nobo pa controla exportacion di petroleo di Iran, momentonan despues cu e dos pais a conclui un prome ronda di dialogo na Oman.
Segun un comunicado di Departamento di Estado, e medidanan ta apunta na 15 entidad, dos persona y 14 barco di e yama “flota fantasma”, loke ta conecta cu comercio di petroleo y productonan petrolero Irani.
“Presidente Donald Trump ta comprometi pa reduci exportacion ilegal di petroleo y petrokimico di e regimen Irani bao e campaña di presion maximo di e administracion,” segun vocero di Departamento di Estado, Tommy Pigott.
Minuutnan prome, e regimen Irani a afirma cu e negociacion cu Merca pa evita un escalacion militar lo sigui, na final di e prome ronda celebra na Muscat, despues cu Washington a manda barco di guera na e region.
E dialogo na capital Omani ta e prome encuentro di e tipo aki entre e dos enemigo declara desde cu Merca a uni cu Israel den e guera contra Iran na luna di juni 2025, caminda a varios instalacion atomico ser ataca.
Iran a insisti cu e combersacion mester limita exclusivamente na su programa nuclear, cu obhetivo di logra eliminacion di sancionnan cu a pisa fuerte riba su economia pa añas. Sinembargo, Merca tambe kier discuti e programa di misil balistico Irani y e apoyo di Teheran pa faccionnan arma rival di Israel den Medio Oriente.
Pa mantene presion, Merca tin mas cu un decena di barco di guera y un carrier di avion desplega den Golfo.
A pesar di e tension, Minister di Exterior Irani, Abbas Araqchi, a declara cu e combersacion a pasa den un “ambiente hopi positivo”.
“Nos a cambia nos punto di bista,” el a bisa na television estatal Irani despues di negociacion indirecto cu e enviado di Washington pa Medio Oriente, Steve Witkoff, y Jared Kushner, yerno di e presidente di Merca. “Ta un bon cuminsamento,” Araqchi a agrega.
Segun e, e dos banda “a bay di acuerdo pa sigui cu e negociacion, pero e modalidad y cronograma lo ser determina mas dilanti”. Den declaracion pa agencia di noticia Irna, Araqchi a subraya cu e dialogonan ta enfoca “solamente riba e asunto nuclear”. “Nos no ta trata ningun otro tema cu e Mericanonan,” el a specifica.
E minister Irani ta spera cu Washington lo abstene for di “menasa” pa permiti continuacion di e proceso. “Nos tin intencion di reuni atrobe den un momento oportuno; Teheran y Washington mester evalua cuidadosamente e resultadonan,” a declara e Minister di Exterior di Oman, Badr al-Busaidi, kende a bisa cu e dialogo a permiti “identifica areanan unda progreso ta posibel”.
Segun imagen di agencia di prensa Omani, almirante Brad Cooper, hefe di United States Central Command (Centcom), tabata presente durante e dialogo, cu segun un fuente cercano na e negociacionnan, a tuma luga na residencia di Al-Busaidi.
Riba diahuebs, vocero di Cas Blanco a declara cu Washington ta intenta explora un escenario di “cero capacidad nuclear” pa Iran y cu Trump tin “hopi opcion na su disposicion, fuera di diplomacia”.
