(InfoBae) — Merca, Australia y Reino Uni a anuncia diaranson un sancion coordina contra Media Land, un proveedor Ruso di ‘bulletproof hosting’ cu a facilita operacionnan di ransomware y otro forma di cibercriminalidad, den un accion trilateral cu ta inclui designacion di tres miembro di su manehamento y tres compania familiar.

E Departamento di Tesorera di EU a informa den un declaracion cu Media Land, cu ta basa na Saint Petersburg, a duna servicio na mercado criminal y actornan di ransomware, incluyendo gruponan prolifero manera Lockbit, BlackSuit y Play. E infrastructura di e compania tambe a ser usa den hopi atake di ‘distributed denial of service’ (DDoS) contra companianan Mericano critico y infrastructura vital.

“Proveedor di bulletproof hosting manera Media Land ta duna na cibercriminalnan servicionan esencial pa yuda nan ataca companianan den Merca y paisnan alia,” John K. Hurley a bisa, subsecretario di Tesorera pa Terorismo y Inteligencia Financiero. “E accion trilateral di awe, den coordinacion cu autoridadnan di ley, ta demostra nos compromiso colectivo pa combati cibercriminalidad y protege nos ciudadanonan.”

Hosting diseña pa evadi ley
 Proveedor di bulletproof hosting ta bende acceso na servernan specialisa y otro infrastructura di computacion diseña specificamente pa evadi deteccion y pa desafia e esfuersonan di autoridadnan pa interumpi actividad cibernetico cu mal intencion.

Aleksandr Volosovik, CEO di Media Land, ta anuncia regularmente e negoshi den foro di cibercriminal bao di e alias “Yalishanda”, ofreciendo server y asistencia tecnico na actornan di ransomware y DDoS, segun e declaracion di Tesorera.

Kirill Zatolokin, empleado di Media Land, ta responsabel pa colecta pago di cliente y coordina cu otro actor cibernetico, trahando hunto cu Volosovik den operacion completo di e compania.

E Oficina pa Control di Bienes Stranhero (OFAC) tambe a designa Yulia Pankova, cual tin conocemento di e actividadnan ilicito di Volosovik, a yud’e cu asuntonan legal y a maneha su finanzas. Ademas, OFAC a sanciona ML Cloud, Media Land Technology y Kirishi Data Center, companianan familiar y subsidiario di Media Land.

Presion riba evasion di sancion
E sancionnan ta persigui tambe e esfuersonan pa evadi sancion despues di designacionnan anterior. Despues cu OFAC a sanciona Aeza Group riba 1 di juli 2025, e direccion di e empresa aki a cuminsa un strategia di ‘rebranding’ enfoca riba kita cualkier conexion entre Aeza y su infrastructura tecnico nobo.

“E designacionnan di awe ta sirbi como un recordatorio cu OFAC lo tuma tur medio posibel pa contraresta actividad di evadi sancion pa actornan cibernetico malicioso y e persona cu ta permiti nan”, segun e comunicado.

OFAC a nombra Hypercore Ltd., un compania Britanico registra cu Aeza Group despues di su sancion pa move su infrastructura di IP y evadi sancion. E tambe a sanciona Maksim Vladimirovich Makarov, director nobo di Aeza ken a tuma e decision clave relaciona cu e esfuersonan pa evadi sancion di e grupo, y tambe Ilya Vladislavovich Zakirov, ken a yuda establece companianan nobo y metodonan di pago pa sconde e actividad continuo di Aeza.

Adicionalmente, OFAC a nombra Smart Digital Ideas DOO (Serbia) y Datavice MCHJ (Uzbekistan), companianan cu Aeza a utilisa pa evadi sancion y pa establece infrastructura tecnico cu no ta publicamente asocia cu e marca Aeza.

Aumento Global
E sancionnan ta tuma luga den un contexto di intensificacion di ciber-guera entre potencianan global. Pais contra producente pa e West, manera Rusia—hunto cu China, Iran y Corea di Norte—a intensifica dramaticamente nan uso di capacidad cibernetico ofensivo, cu Moscu sobresaliendo pa strategia hibrido cu ta combina desinformacion, sabotahe y hacking coordina.

Na mesun momento, ransomware a bira un industria criminal sumamente sofistica. Organisacionnan criminal ta opera cu vocero, negociadornan y proceso industrialisa, causando perdidanan anual di biyones di dollar. 75% di organisacionnan lo bira victima di ransomware mas cu un biaha durante 2025, segun proyeccion di expertonan di ciberseguridad.

Como resultado di e sancionnan, tur propiedad y interes den propiedad di e personanan designa —sea den Merca of bao di posesion of control di personanan Mericano—ta keda blokia y mester ser reporta na OFAC. Reglanan di OFAC generalmente ta prohibi tur transaccion pa personanan di Merca cu involucra cualkier propiedad di personanan designa.

Institucionnan financiero y otro actornan cu ta envolvi den cierto transaccion cu entidad y individuonan sanciona por ser exponi na sancion of someti na accion di ley.