Relaciona cu desaroyonan recien entre Venezuela y Guyana, unda Venezuela a menasa di invadi e region di Esequibo cu nan ta considera como parti di nan teritorio, Comando Sur di Merca a conduci operacionnan di vuelo den sosten di soberania di Guyana.
Recientemente, presidente Venezolano Nicolas Maduro a tene un referendum pa laga pueblo Venezolano dicidi si mester anexa Esequibo den teritorio Venezolano. E disputa aki tin decadas ta andando, y e region Esequibo ta constitui como dos tercer parti di henter teritorio Guyanes.
Presidente Guyanes, Irfaan Ali a indica cu a tuma contacto cu aliadonan den region pa prepara nan defensa contra un eventual invasion Venezolano. Ayera, Comando Sur di Merca (USSOUTHCOM) den un comunicado di prensa a indica cu a conduci “operacionnan di vuelo cu Guyana riba 7 di december. E ehercicio aki ta expande riba acercamento rutinario y operacionnan pa reforsa partnership di seguridad entre Merca y Guyana, y pa reforsa cooperacion regional.
“Ademas di e ehercicio aki, USSOUTHCOM ta bay continua su colaboracion cu e GDF den areanan di preparacion pa desaster, seguridad marino y aereo, y combati organisacion criminal transnacional. Merca ta bay continua su compromiso como partner confia di seguridad pa Guyana y pa promove cooperacion y interoperabilidad”, e comunicado a finalisa bisando.
