(AP) – E agencia lider di desaroyo di Merca tin plan di bolbe sigui cu e entrega di cuminda pa miyones di persona na Ethiopia den december, 5 luna despues cu nan a tuma e paso extraordinario di stop su programa den henter e nacion a causa di un skema di corupcion masivo di oficialnan local.
U.S Agency for International Development (USAID) su oficialnan riba diaranson a describi reformanan nobo den con lo lidia cu e ayudo di cuminda manda na e pais pa asina preveni cu lo bolbe pasa loke nan ta describi como un di e robonan mas grandi di ayudo di cuminda den historia. Lo test e medidanan aki pa un aña, vocero di USAID Jessica Jennings a bisa, agregando cu “lo cambia fundamentalmente Ethiopia su sistema di ayudo di cuminda y yuda sigura cu e ayudo yega e personanan cu ta experiencia falta di siguridad di cuminda agudo.”
Ethiopia ta Africa su di dos pais mas pobla y un di e recipientenan mas grandi d ayudo humanitario di Merca a causa di secura, conflicto y otro factornan cu ta stroba e suministro di cuminda. Mas o menos un di seis parti di ciudadanonan di Ethiopia a ricibi ayudo di cuminda prome cu a descubri e robo di cuminda anteriormente e aña aki. E suspension a afecta 20 miyon persona di Ethiopia. AP a reporta cu centenares y posiblemente miles di persona den necesidad a fayece a causa di hamber den e region di Tigray desde e suspension.
E robo aki di ayudo di cuminda for di Merca y Nacionnan Uni a inclui e manipulacion di lista di beneficiario cu e gobierno a insisti di controla, robo di gobierno y forsanan regional di Tigray ademas di Eritrea y e dunamento di cantidadnan masivo di suministro na companianan comercial den por lo menos 36 sitio segun oficial di USAID a conta AP.
