(AP) — Ministerio di Comercio di China a bisa diahuebs cu e movida di Merca pa revoca e ordennan ehecutivo di administracion di Trump cu intencion di prohibi appnan manera TikTok y WeChat tabata un ‘stap positivo’ memey di relacionnan tenso entre ambos pais.
“Nos ta spera cu Merca lo trata companianan Chines hustamente y evita politisa asuntonan economico y comercial”, vocero di e ministerio, Gao Feng a bisa na un conferencia di prensa regular diahuebs. Gao a bisa cu e movida di Merca pa revoca e accionnan di e gobierno anterior contra appnan manera TikTok y WeChat ta un ‘stap positivo den e direccion corecto’.
Cas Blanco diaranson a revoca algun orden amplio haci bao ex-presidente Donald Trump contra apnnan Chines, incluyendo e app di mensahe WeChat, app di video cortico TikTok y app di pago Alipay. Un orden ehecutivo nobo di presidente Joe Biden a bisa cu Merca lo conduci un analisis ‘basa riba evidencia’ di transaccionnan involucrando appnan cu ta crea, suministra of controla pa China.
Ministerio di Relacionnan Internacional di China a reitera na un conferencia di prensa diario cu China lo continua defendiendo su interesnan. A urgi Merca pa ‘stop di generalisa e concepto di seguridad nacional y abusa poder estatal pa suprimi empresanan di tecnologia Chines’.
Cortenan a blokea esfuersonan di administracion di Trump aña pasa pa prohibi TikTok y WeChat, pero e Comite riba Inversion Stranhero na Merca (CFIUS) ainda ta ehecutando un revision di seguridad nacional riba TikTok.
E postura di administracion di Biden ta refleha preocupacion cu data personal di usuarionan por ta exponi pa appnan popular cu lasonan cu China si e Partido Comunista pone presion riba companianan pa comparti data.
E administracion a bisa na februari cu ta reemplasando e maneho di Trump cu un strategia mas enfoca. En realidad ainda no a expresa un opinion riba si TikTok of otro appnan ta presenta un peliger pa ciudadanonan Mericano.
Un oficial senior di e administracion a bisa diaranson cu accionnan di Trump no semper a wordo implementa di e miho forma. E meta di e revision ta pa pone criterionan cla pa evalua riesgonan specifico di seguridad di data y privacidad pa cada app, el a bisa. Esaki por conduci na un variedad di potencial accionnan futuro riba un base di app-pa-app.
“Nos kier un maneho personalisa y fuerte aki”, el a bisa.
CFIUS a pone fechanan limite pa TikTok desinverti den su operacionnan Mericano, pero un benta asina no a tuma luga.
Siman pasa, administracion di Biden a expande un lista di companianan Chines riba un blacklist di era di Trump, pa supuestamente tin lasonan cu ehercito Chines y vigilancia. Companianan Mericano y individuonan no por inverti den e companianan aki, cu ta inclui proveedor di aparato di telecomunicacion Huawei, y compania di petroleo Chines, China National Offshore Oil Corp.
Oficialnan y companianan Chines a nenga cu nan producto y servicionan ta presenta un menasa pa seguridad.
Relacionnan entre Beijing y Washington ta keda tenso, cu cada banda imponiendo sancionnan incluyendo tarifa riba exportacion di e otro.
Legislatura Chines a pasa legislacion diahuebs delineando e base legal pa retaliacion contra sancionnan stranhero pa motibo di asuntonan manera Hong Kong y e region nort occidental di Xinjiang, unda ta acusa China di corta libertad y comete abuso di derechonan humano.
E ley anti-sancion ta permiti China tambe nenga di otorga visa, nenga entrada, cancela visa y deporta esnan responsabel pa formula y implementa sancionnan como tambe confisca nan bienes dentro di China y prohibi transaccionnan financiero y otro interacionnan cu nan.
Vocero di Ministerio di Relacionnan Internacional, Wang Wenbin a bisa cu e ley tabatin meta pa ‘resolutamente salvaguardia soberania nacional, dignidad y interesnan central, y opone hegemonismo occidental y politica di poder’, y tambe ‘duna sosten legal y garantianan pa e pais pa combati medidanan discriminatorio di un pais stranhero di acuerdo cu ley’.
Wang a critica yamadonan di Secretario di Defensa, Lloyd Austin pa mas atencion na e poder militar creciente di China, acusando Washington di ‘hunga e carta di China’ como un pretexto pa aumenta gasto militar Mericano y busca di ‘contene China’.
Tambe el a protesta e referencia di prome minister Hapones, Yoshihide Suga, na Taiwan como un pais durante un debate parlamentario diaranson. China ta considera e democracia autonomo di e isla como su propio teritorio, y ta lihe pa coregi cualkier persona of compania cu referi na esaki como un pais.
Suga a haci un referencia rapido na Taiwan, New Zealand y Australia mientras tabata contesta un pregunta tocante medidanan di pandemia, y despues a referi na esakinan como ‘tres pais’. Wang a bisa cu e comentario a viola e ‘promesa solemne’ di Hapon pa ‘no considera Taiwan como un pais’.
“Nos ta deplora fuertemente e comentarionan eroneo di Hapon y a entrega kehonan solemne cerca Hapon, exigiendo pa Hapon inmediatamente laga na cla clarificacionnan pa elimina e efectonan adverso causa pa e comentarionan relevante, y pa sigura cu situacionnan asina no lo bolbe sucede”, Wang a bisa.
