(AP) — Diaranson, Merca a desplega dos barco di guera na un banco disputa den e South China Sea unda dos barco Chines a accidenta na comienso di siman mientras nan tabata purba kita un barco mas chikito di Filipinas for di e area, den un incidente den awa habri cu a causa preocupacion tocante seguridad maritimo.
Tanto China como Filipinas ta reclama Scarborough Shoal y otro salidanan den e South China Sea. Vietnam, Malasia, Brunei y Taiwan tambe tin reclamonan den e awa disputa.
E USS Higgins, un destructor cu misil guia, y USS Cincinnati, un barco di combate litoral, a ser sombra pa un barco di marina Chines mientras nan tabata nabegando aproximadamente 30 miya nautico (55 kilometer) for di Scarborough Shoal. No tabatin reportahe di incidente inespera, segun e Comandante di Guardacosta di Filipina, Jay Tarriela, basa riba informacion di oficialnan Mericano y un vuelo di vigilancia di Filipinas.
Marina di Merca a tuma biahe y vuelonan di “libertad di nabegacion” den e South China Sea durante añas pa desafia e restriccionnan di China y su exigencia pa notificacion di entrada den practicamente tur seccion di e awa disputa cu e ta reclama. Esaki a keda provoca rabia di China, y su forsanan casi a drenta den conflicto cu barco y avionnan di Merca durante patruya den awa y espacio aereo internacional.
E despliegue a tuma lugar despues cu embahador di Merca na Manila, MaryKay Carlson, a condena diamars “e accion iresponsable mas reciente di China contra un embarcacion di Filipinas” den Scarborough. E atolon di pesca rico noroeste di Filipinas a keda e punto di confrontacionnan tenso entre barconan di guardacosta, pesca y otro embarcacionnan di China y Filipinas durante e ultimo añanan.
Filipinas ta e aliado mas bieu di Merca den Asia. Washington a adverti hopi biaha cu e tin un obligacion pa defende Filipinas si forsanan Filipino ser ataca cu arma, incluyendo den e South China Sea.
Dialuna, un destructor di marina Chines y un barco di guardacosta Chines a dal den otro accidentalmente mientras nan tabata purba blokia y kita un barco mas chikito di guardacosta di Filipinas, e BRP Suluan, aproximadamente 10.5 miya nautico (19 kilometer) for di Scarborough. Video cu guardacosta di Filipinas a publica ta mustra e barco di guardacosta Chines usando cañon di awa y varios miembro di tripulacion Chines para na e boca, poco prome cu e seccion aki a accidente cu e barco di marina Chines cu a bira rapidamente.
Poco despues di e accidente, e video ta mustra e boca di e barco di guardacosta Chines gravemente daña sin e personalnan Chines cu tabata para riba e deck prome di e accidente. E barco di marina Chines a keda cu golpinan profundo y loke ta parce un rasca largo riba su hull.
