(CuraçaoChronicle) – Merca ta desplegando tres destroyer di misil Aegis – USS Gravely, USS Jason Dunham y USS Sampson – den awa cerca di Venezuela den un esfuerso pa combati menasa di cartel di droga Latino Americano, segun Reuters a reporta ayera.
E movida ta parti di un operacion militar a gran escala den sur di Caribe involucrando alrededor di 4mil marinier y personal di marina, avion reconnaissance P-8, varios barco di guera, y al menos un submarino di atake.
Mientras tur operacion ta tumando lugar den awa y espacio aereo internacional, oficialnan Mericano a confirma cu por usa e destroyers como plataforma di lansamento pa atake enfoca si esaki ta rekeri.
Presidente Mericano, Donald Trump a declara cu e despliegue ta destina pa reforsa e lucha di Washington contra e cartelnan poderoso. Entre e gruponan designa como “organisacion terorista global” pa Merca, tin e Cartel di Sinaloa di Mexico, y Tren de Aragua di Venezuela, ambos acusa di trafica cantidadnan grandi di narcotico den e region.
Na Caracas, presidente Venezolano, Nicolas Maduro a responde den termino impreciso na e presencia militar di Merca. Sin menciona e barconan directamente, el a declara cu Venezuela lo defende su “lama, aire y tera” contra loke el a describi como “e menasa straño di un imperio den collapse.”
E despliegue ta subraya e aumento di tension entre Washington y Caracas y ta refleha preocupacion creciente di Merca tocante e rol di Caribe como gang strategico pa crimen organisa y contrabanda di narcotico.
