(AFP)— Dialuna Merca a kita Siria for di su lista di estadonan cu ta patrocina terorismo, cancelando un clasificacion cu tabatin decadas den existencia y cu tabata inclui restriccionnan economico severo, marcando un otro paso den esfuerso pa construi relacion estrecho entre e dos paisnan.
Departamento di Estado di Merca tambe a revoca clasificacion di Frente al-Nusrah—tambe conoci como Hay’at Tahrir al-Sham (HTS)—como un organisacion terorista mundial. Tabata rebeldenan lidera pa HTS cu a tumba e gobierno di Bashar al-Assad na december 2024.
Departamento di Tesoreria a sigui cu alivio di sancionnan. “E accion di awe lo yuda promove mas inversion na Siria pa fomenta stabilidad politico y economico,” secretario di Tesoreria Scott Bessent a bisa den un comunicado.
Tesoreria a bisa cu e medidanan ta “conforme cu promesa di presidente (Donald) Trump pa alivia sancionnan contra Siria”.
Pero e departamento a enfatisa cu eliminacion di restriccionnan contra Siria “no ta cambia postura di Tesoreria tocante e lucha contra terorismo mundial y nos compromiso pa responsabilisa esnan cu ta comete mal acto na Siria”.
HTS tabata conoci anteriormente como Frente Al-Nusra y tabata e rama di Al-Qaeda na Siria. E grupo a kibra lasonan cu e organisacion jihadista na 2016.
Merca a anuncia inicialmente na juli su intencion pa kita Siria for di lista di estadonan cu ta patrocina terorismo, un paso considera como un voto di confianza den Ahmed al-Sharaa, lider di HTS cu a asumi poder despues di e caida di Assad, poniendo fin na un guera civil cu a dura 13 aña.
Trump a reuni na banda di un cumbre di NATO na Turkia cu Sharaa, un ex-jihadista cu a purba di presenta su mes como un figura unificador despues di tumba e famia Assad, cual a goberna cu man duro pa mitar siglo.
Secretario di Estado di Merca Marco Rubio a bisa cu e decisionnan di dialuna pa kita e clasificacionnan ta duna Sirionan “un caminda pa prosperidad”.
E paso “ta elimina e ultimo obstaculonan grandi pa inversion di sector priva na Siria y ta promove recuperacion economico di Siria y su reintegracion den economia mundial,” el a bisa den un comunicado.
Gobernador di Banco Central di Siria tambe a celebra e retiro di su pais for di e lista di Merca di estadonan cu ta patrocina terorismo.
“Pone fin na clasificacion di Siria como un estado cu ta patrocina terorismo ta un paso historico cu ta reestablece e pais na su lugar natural den e sistema economico mundial,” Safwat Raslan a bisa riba X, agregando cu e banco ta “trahando pa construi un sistema financiero moderno y confiabel”.
