(AP) — Merca ta bay haci uso completo di su capacidad militar, “incluyendo defensa nuclear, convencional y misil” pa defende su aliadonan Hapon y Sur Korea, segun Secretario di Estado interino, Wendy Sherman a bisa ayera, advertiendo Nort Korea contra escalacion di su provocacionnan.
Sherman a bisa cu e lansamentonan ripiti di misil balistico y artilleria Nort Koreano den simannan recien tabata accionnan militar provocativo. Nort Korea a describi nan como practica pa uso di arma nuclear tactico.
Sherman a bisa cu Nort Korea mester compronde cu e compromiso Mericano pa cu seguridad di Nort Korea y Hapon ta “ironclad”.
Sherman anteriormente a reuni cu vice-ministro di Exterior Hapones, Takeo Mori y a reafirma cu ta reforsa e aliansa Merca-Hapon y otro metanan comun, incluyendo e completo desnuclearisacion di Nort Korea y nan respuesta conhunto contra e accionnan cada bes mas asertivo di China den e region.
Minister di Defensa Hapones, Yasukazu Hamada recientemente a bisa cu ta kere cu Nort Korea a logra un miniaturisacion di warhead nuclear, mientras significantemente ta avansa su capacidadnan misil door di diversifica su tecnologia di lansamento, haciendo intercepcionnan mas dificil.
Oficialnan Hapones tambe a adverti di un posible test nuclear di Nort Korea den futuro cercano.
Oficialnan Hapones y Sur Koreano a reuni cu otro mas laat ayera pa discuti manera pa mehora lasonan entre nan pais, cual a keda afecta pa desacuerdonan relaciona cu accionnan di Hapon durante guera, incluyendo abuso di trahadornan forsa Koreano y obligando muhe y mucha pa traha den burdel pa soldadnan Hapones.
