Un tornado a destrui varios edificio na e capital di Missouri mientras cu un tormenta tabata pasa na e stad durante anochi. El a mata tres persona y laga varios herida, segun autoridad a informa.
Servicio Nacional di Meteorologia di Merca a confirma cu un tornado grandi y destructivo a pasa na Jefferson City prome cu madruga. Gobernador Mike Parson a bisa cu e servicio di emergencia a actua lihe y den bon coordinacion ora tabata trata cu condicion peligroso.
E mal tempo a bin for di Oklahoma, ekipo di emergencia tabata lucha pa rescata hende for di awa cu tabata core. E siman aki a produci varios tornado y awasero na e parti sur y nort di Merca.
David Williams, polis local, a bisa cu mas o menos 20 persona a ser rescata pa personal di emergencia, aunke no tin informe si tin persona cu a desaparece, pero autoridad tin plan pa realisa inspeccion cas pa cas. Williams a bisa cu a ricibi varios aviso di persona trapa na nan cas. “E situacion na e momento aki ta un caos. Nos mester hende cu no ta afecta keda leu di e zona aki.”
Un tornado a pasa poco kilometer leu di Joplin, Missouri, despues di 8 aña di e tornado cu a mata 161 persona na e ciudad. E tornado nobo a causa algun daño den localidad di Carl Junction, un 6.5km nort di aeropuerto Joplin.
