(Infobae) – E presidente di Merca a detaya e termino nuclear di e alto al fuego di dos siman cu Teheran y a menasa cu tarifanan di 50% riba cualkier pais cu suministra armamento na Iran.

E presidente di Merca, Donald Trump, a declara diahuebs cu Iran no lo por enrikece uranium y cu Merca lo traha hunto cu Teheran pa extrae y kita desecho nuclear for di su facilidadnan subteraneo, cual a ser afecta pa bombarderonan B-2 durante e ofensiva. Trump a presenta esaki como un di e puntonan central di e alto al fuego di dos siman alcansa entre ambos paisnan. Reuters a reporta cu Trump a bisa cu Washington lo “traha cerca” cu Iran y cu den su bista, hopi di e puntonan principal di e acuerdo ya tabata acorda.

E presidente a señala cu hopi di e 15 punto di e acuerdo entre Washington y Teheran “ya a ser acorda” y a anticipa combersacionnan tocante alivio di tarifa y sancionnan. Trump a describi e situacion como un “cambio di regimen hopi productivo” y a bisa cu Merca lo traha “cerca” cu e pais di aki pa dilanti. Reuters y AP a reporta cu e acuerdo di alto al fuego ainda ta fragil y cu varios termino importante no tabata cla publicamente na momento di e anuncio.

E declaracion aki ta representa un di e declaracionnan mas explicito di Trump tocante e metanan nuclear di e guera, cu Washington y Israel a cuminsa dia 28 di februari. Terminacion di e programa nuclear Irani a ser presenta pa Trump como un punto clave di e conflicto, aunke te awor e termino specifico di e acuerdo tabata den disputa ainda. Reuters a reporta cu un funcionario halto di Israel, papiando bao di anonimidad, a bisa cu Washington a compromete pa pusha pa e retiro di material nuclear y desmantelacion di e programa di misilnan balistico di Iran.

Den un segundo publicacion, Trump a menasa cu lo impone inmediatamente un tarifa di 50% riba tur biennan for di cualkier pais cu suministra armamento militar na Iran. “No lo tin ningun exclusion of exencion,” e presidente a adverti. Reuters a reporta cu e advertencia ta apunta directamente na e principal suministradornan di arma di Teheran, aunke Trump no a nombra paisnan specificamente.

E fragilidad di e acuerdo a bira evidente algun ora despues di su anuncio. Reuters a reporta cu Iran a lansa misilnan y dronenan nobo contra diferente blanco den e Golfo, y cu un planta di proceso di gas na Abu Dhabi a pega na candela den medio di e escalada regional.

Desde cu e guera a cuminsa, e cifra di morto den Iran a sigui subi. Reuters a reporta na maart cu mas cu 2.000 persona a perde nan bida den e conflicto, mientras cu otro reportahenan anterior a menciona mas cu 1.300 morto segun representante Irani den Nacionnan Uni. E cifra exacto ta keda incierto, parcialmente pasobra e gobierno Irani no a sigui actualisa regularmente e cantidad oficial di victima.