(AFP) — Mercadonan global di accion a subi dialuna pa recordnan historico, mientras prijs di petroleo a baha y inversionistanan a sigui desaroyonan riba Venezuela, un pais rico den crudo, y e perspectiva di economia global.
Ainda banda di e preocupacion geopolitico crea door di e sorpresivo operativo militar di Merca diasabra na Caracas — unda presidente Venezolano Nicolas Maduro y su esposa a ser hiba pa Nueva York — algun mercadonan grandi di accion a cuminsa e aña nobo cu maximo historico, despues cu nan ya a kibra varios record durante 2025.
Seoul a subi mas cu un porciento dialuna y a pasa e marca di 4.500 punto pa prome biaha, impulsa door di otro cambio fuerte den accion di gigante di chip SK hynix. Esaki a sigui despues cu Dow Jones,ken a cera na un maximo historico dialuna na Wall Street, pusha door di un fuerte subida den accionnan di gigante tecnologico Amazon y Meta.
Indice principal di Londres, FTSE 100, a alcansa un maximo nobo dialuna y a pasa e nivel di 10.000 punto, cu inversionistanan sperando mas reduccion di tasa di interes den Reino Unido pa impulsa crecemento na 2026. “Ayera tabata Dow Jones y Dax cu recordnan historico, y awe FTSE 100 a uni cu e fiesta, apenas un siman despues di su ultimo record,” analista Chris Beauchamp di plataforma di trading IG a bisa.
El a agrega cu inversionistanan no ta parce ta perturba door di tensionnan den aliansa occidental despues di e operativo di Merca, ni tampoco door di evaluacionnan halto di accionnan.
“Accionnan global probablemente lo sigui ignora e choke geopolitico mientras e no menasa e cadena di suministro global ni preta condicionnan financiero, pasobra geopolitica a bira un caracteristica persistente mas cu un sorpresa,” Charu Chanana, experto den strategia principal di inversion na Saxo Markierts, a bisa.
“E ta posibel cu accionnan sigui subi poco poco si expectativa di ganashi, likides y tasa di interes permanece faborable, specialmente den sector tecnologico,” el a agrega.
Accionnan di Nvidia a subi mas cu un porciento na cuminsamento di trading, despues cu e compania mas valioso di mundo a presenta su mas recien plataforma di inteligencia artificial e anochi anterior, aunke despues nan a baha un parti di e ganashi ey.
Indice principal di Wall Street a sigui pusha ariba, cu Dow Jones cayendo net cortico di establece un record nobo historico. Tradernan ta sperando dato importante riba empleo na Merca cu ta sali diabierna, pa haya indicacion riba futuro di tasa di interes.
Reserva Federal ta spera sigui baha costo di prestamo den Merca e aña aki, pero cantidad di reduccionnan ainda no ta cla.
Prijs di petroleo a baha despues di pasa gran parti di dialuna na nivelnan mas halto.
Desde e operativo di Merca diasabra, prijs di petroleo a mustra movemento instabil.
Aunke Venezuela tin mas o menos un cinco parti di reserva di petroleo di mundo, observadornan a destaca cu un rapido aumento di produccion lo ta limita door di varios problema, incluyendo infrastructura deteriora, prijs relativamente abao y incertidumbre politico.
“Cu e pais produciendo menos cu un porciento di petroleo global despues di añanan di falta di inversion, cualkier gran estorbo den corto plaso ta parce mas ruido cu impacto real,” Matt Britzman, analista di alto nivel di accion na Hargreaves Lansdown, a bisa dialuna.
