Durante conferencia di prensa di partido AVP, parlamentario drs. Mervin Wyatt-Ras, despues di a desea un y tur un bon aña, a trece padilanti cu e aña aki ta 35 aña di nos Status Aparte. Despues di e lucha pa logra esaki y mantene, awor e gobierno aki a acepta tur tipo di condicion di Hulanda y a pone nos Status Aparte na peliger.

Wyatt-Ras a expresa su preocupacion pa loke ta trata COVID-19. E virus aki ta devastador, no solamente pa Aruba, sino pa henter mundo.

E parlamentario a trece padilanti cu e cantidad di casonan a crece compara cu prome. En special den e ultimo parti di e aña aki. Por papia di un “third wave” of tercer ola di Covid y ta di spera cu gobierno ta transparente y responsabel pa atende cu e ola aki. Por bisa cu e prome ola tabata desde maart di aña 2020 na momento cu World Health Organisation a declara COVID-19 como un pandemia. E tempo ey e tabata yama Coronavirus y nos a cera nos fronteranan y despues na juli, pa ta mas exacto despues di 10 di juli, cu a habri nos fronteranan nos a haya nos mes cu mas caso y e segundo ola. E cantidad di caso a subi te 1500 y mas cu esey, pa despues baha. Awor nos ta haya nos confronta cu un ola cu ta biniendo na caminda. Wyatt-Ras ta haya cu gobierno mester prepara su mes y nos hendenan pa esaki. Segun Wyatt-Ras e medidanan cu a wordo tuma a ser tuma mucho laat. Den e tempo ey di Pasco y Aña nobo, no tabatin hopi test haci. Segun DVG personanan no tabata acudi pa haci test y casonan a aumenta te cu 110 caso riba un dia, esta dia 6 di januari. Di e cantidad aki 109 ta local. En total tin 5237 caso di cual 5060 ta local (96.6%). Esey ta segun estadistica di DVG di 6 di januari. Un preocupacion grandi ta cu den hospital tin 13 pashent cu COVID di cual 5 ta interna den ICU. Segun Wyatt-Ras nos mester prepara nos mes pa e ola aki no dal nos duro pa motibo cu e presion ariba enfermeronan y specialistanan lo por aumenta drastico. Ta necesario alabes pa hospital tin suficiente material, ventilator y tur locual mester pa facilita nan trabou di duna cuido.

Pa haya claridad encuanto esaki y otro puntonan Wyatt-Ras a manda 22 pregunta dirigi na minister encarga cu e cartera di Salubridad. Wyatt-Ras a puntra encuanto e backlog of atraso cu tin den trato di pashentnan y con lo bay haal in e retraso aki. Paso esaki por ocasiona cu e malesa of malestar di e pashent por bira pio. Esaki ta un preocupacion cu specialistanan a expresa durante e brainstormings-sessie organisa dor di partido AVP. Un otro pregunta ta regarda testmento.  Pa loke ta trata e testnan, na final di aña hopi hende no a test. Den comienso di aña por a nota si cu mas hende ta haci test pa saca afo si nan tin COVID. Sinembargo e testnan aki ta hopi importante pa DVG por sa y por yega na contact tracing. Wyatt-Ras ta spera cu DVG por sigui cu e trabou di controla na un forma efectivo.

Un otro pregunta ta dirigi ariba otro medidanan cu lo tuma pa zorg cu nos hendenan no wordo contagia. Pasobra hopi biaha ta tuma medida pero nan no ta conta pa tur hende. P.e. bispo di Aña Nobo. Restaurantnan mester a cera na cierto ora (10or) y nos hendenan no por a bishita otro manera anterior. Contrario na esaki si a laga sitionan nocturno habri unda por tin brotenan. Un ehempel di esaki cu a ser menciona dor di cantidad di hende y medionan social ta “Bochincha”. Den e gobierno aki en bes cu tin “ley pa un ley pa tur” tin “ley pa un sin ley pa friends and family” Esaki no ta un situacion corecto. Lo mester tin igualdad y mas control pa tur hende. Lo mester tin formanan estricto pa anda cu esaki.

A referi tambe na Cuerpo Policial cu mester ta streng cu tur hende, sin distincion. Mester por tuma medida cu accionnan asina. Paso dicon un restaurant mester cera y no un club of sitio nocturno?Wyatt-Ras a lansa preguntanan tambe pa loke ta trata vacuna cu lo bin Aruba. Tin e marcanan Pfizer, Moderna y otronan den desaroyo. Tur mester ser warda den temperatura bou cero. Den promer instante por a compronde cu lo bin mas o menos 2000 vacuna Aruba, mientras cu den e ultimo Conferencia di Prensa di minister el a indica comosifuera e cantidad no ta conoci.

Ta importante pa nos pueblo por sa cuanto vacuna lo bin Aruba y ken lo wordo vacuna? Nos sa si cu e personanan cu lo haya vacuna den promer instante mester ta frontliners, personanan cu ta traha den cuido, nos grandinan y esnan vulnerable di salud. Hulanda a stipula exigencianan pa Gobierno di Aruba cumpli cune prome cu por ricibi e vacunanan. Esakinan ta encera e temperatura bou di cero pa por warda e vacunanan, un plan di registracion, distribucion y coordinacion, etc. Ta parce cu Hulanda kier pa e vacuna bay pa e personanan cu mester hay’e y kier preveni pa vacuna bay prome pa friends and family. Pregunta a ser haci alabes riba e paspoort di salud cu kier introduci, cuanto e lo costa y cual ta na su beneficio. Pasobra ya caba nos tin e carchi geel cu ta un certificado internacional di vacuna.

Tur idea ta bon bini pero nan mester ta efectivo pa nos por limita contagio.

Banda di e paspoort pa drenta Aruba mester tin tambe e precaucion pa drenta hogarnan. Esaki por dor di mas control, social distancing y tur medida di higiena pa nos keda sano pa nos por reconstrui nos economia. Paso si nos hendenan keda malo ta bay tuma mas tempo pa nos por labora y desaroya nos pais. Ademas Wyatt-Ras ta keda haya cu ta net den cuido ta tuma medida di 5%. Otro paisnan no ta corta den cuido, hasta esnan cu ta traha den cuido ta haya mas sosten financiero.

Pero no ta Hulanda mester dicidi pa nos. Ta e minister mester dicidi pa duna mas sosten necesario na esnan cu ta traha den cuido pa e trabou y dedicacion cu nan tin pa nos ciudadanonan malo! Bo kier pa nan traha 24 ora pa dia pa atende pashentnan pero no ta duna nan sosten. Wyatt-Ras ta spera di haya contesta ariba e preguntanan cu su persona a haci na minister y cu e por bin Parlamento pa duna informacion. Nos mester tin e informacion aki pa nos cuestiona Gobierno ariba presupuesto di e aña aki cu lastimamente te ainda no a drenta Parlamento.

LEAVE A REPLY

Please enter your comment!
Please enter your name here