E veredicto duna pa Hoge Raad na Hulanda, den e disputa entre Ernst & Young y e (awe) parlamentario Endy Croes a trece claridad, no solamente den e caso particular aki, sino mas en general tambe. E huesnan di e tribunal a considera cu e normanan cu ta conta na Hulanda pa un registeraccountant ta e normanan na cual nan mester mantene nan mes na Aruba tambe. Logico pasobra ora un caso yega asina leu, ta cu e criterionan aki ta bay huzga trabao di un accountant.

Esey ta bon pa tur hende tene cuenta cune. Di awor en adelante tur hende, y no e accountantnan so, ora ta pidi pa haci e tipo di investigacion aki, unda ta trata interes di hende, mester anda cu tur cautela posible y duna oportunidad pa duna nan banda den e investigacion.

Pero aparte di esaki, tin mas aspecto pa tuma na cuenta. Por ehemplo, cu recientemente Algemene Rekenkamer a laga parlamento sa cu nan ta considera cu e ta dentro di nan facultadnan pa haci investigacion den e caso di fundacion Lotto pa Deporte, e organisacion den cual henter e asunto entre Ernst & Young y e parlamentario menciona a tuma lugar. Esey riba su mes no ta un sorpresa, pasobra esey nos sa pa hopi aña caba… Es mas, nos ta puntra nos mes pakico pa tanto aña largo ningun gobierno a bin riba e tremendo idea pa laga Rekenkamer haci investigacion riba e organismo aki, unda miyones ta move anualmente. Pa clarifica, nos no ta insinua cu a ‘desaparece’ miyones pasobra esey nos no sa. Pero en general un negoshi, pasobra esey e ta, cu tin un benta den careda di cuarenta miyon pa aña merece un escrutinio regular di banda di Rekenkamer, y no a haya esaki nunca.

Algo un poco straño, pasobra nos conoce di cerca e caso di un otro entidad den deporte, cu despues di casi un decada sin haya ningun subsidio di gobierno, un dado momento mester a duna cuenta inmediatamente cerca Rekenkamer di e suma modesto cu nan a ricibi. Nan a duna cuenta tambe, sin problema, pero riba e pregunta ki dia Rekenkamer tin intencion di haci investigacion riba fundacion Lotto pa Deporte nunca nan a haya un contesta. Pa no comprende nos malo: no mester ta asina cu mester tin un sospecho di mal administracion, o pio, pa percura pa supervision di fluho financiero dentro y alrededor di gobernacion. Cu ta te awor ta bin riba e idea cu Rekenkamer por investiga ta realmente no un berguensa so, sino tambe significativo pa e nivel riba cual control riba e tipo di asunto ta move. E mesun caso ta ilustrativo pa esaki: e apreciable parlamentario ta conta cu cierto emocion cu e conflicto den cual el a haya su mes tin 10 aña andando. Casi 10 aña pasa a cuminsa un investigacion contra su persona, cu a bin termina den e dianan aki na su fabor.

Esey ta bon pa su persona, pero nos no ta mira con 10 aña largo tabatin un bataya legal entre un fundacion di interes general (financiero) grandi, nan accountant contra un (ex-)empleado di e fundacion, sin cu ta envolve Rekenkamer den e asunto, pa haci un investigacion hopi mas amplio, y no solamente orienta riba un persona cu a tuma como ‘target’? E contesta ta den splicacion di e contexto politico. Normalmente e tipo di fundacion aki ta mira un cambio di directiva cada cuatro o ocho aña, hunto cu cambio di gobierno. Den e caso aki e awe parlamentario a keda den servicio di e fundacion, pero naturalmente den un ambiente totalmente enemistoso pa su persona, pasobra e gobierno di turno na 2009 a ‘take over’. E directiva nobo tabatin tur interes pa percura pa e sali di e funcion y pesey a charter e accountant. Pero hamas nan lo a pidi Rekenkamer pa haci investigacion, pasobra e ora Rekenkamer lo a bin tira un vista den… nan cushina, y esey ta lo ultimo cu nan kier. Den tur e añanan despues tampoco nan a bin riba e maraviyoso idea ey, pasobra loke nan tabata haci eyden, mester a keda eyden, of no?

Awor nos ta un fase mas leu, unda gobierno a cambia atrobe. Pero kico ta e caso? Cu no a logra cambia e directiva di e fundacion pa esaki cana ‘pareu’ cu e gobierno di turno, manera e ministro encarga a argumenta den corte tambe, ora e no a logra deshaci di e directiva cu ta keto bay di e color politico anterior. Den e situacion aki, di repente ta oportuno pa pidi Rekenkamer haci un investigacion den Lotto pa Deporte, pasobra ta e supuesto contrincante ta sinta eyden ainda, anto esey ta haci factible pa usa e ‘arma’ aki. Pero loke no ta bay sucede, y ta ey ta unda nos ta fayando structuralmente, ta cu mester bin un control y supervision adecua di Rekenkamer riba un fundacion asina, simplemente pasobra ta interes publico, di nos como ciudadano pues, pa sa cu tur cos ta anda eyden manera mester ta. Y pa esey, nos no mester warda te ora tin un ‘mismatch’ entre gobierno y e directiva concerni.