Mesun puntuacion, diferente conseho: posicion den klas ta influencia recomendacion di scol na Hulanda

(NLTimes) – Muchanan cu logra exactamente e mesun puntuacion riba e test final di scol primario na Hulanda por haya diferente recomendacion pa scol secundario, dependiendo di con nan compañeronan di klas a desempeña. Esaki ta sali for di un estudio nobo di Erasmus School of Economics.

Segun e investigacion, muchanan cu ta e mihor studiante den un klas cu, en general, tin un prestacion menos bon, tin mas posibilidad di haya un recomendacion mas halto, manera VWO, cu muchanan cu a logra e mesun puntuacion pero ta den un klas cu e nivel promedio ta mas halto. Na otro banda, studiantenan cu ta na e parti abao di un klas fuerte tin mas riesgo di haya un recomendacion mas abao, manera VMBO.

E estudio, conduci pa Max Coveney, profesor asistente na Erasmus School of Economics, a analisa datonan di Centraal Bureau voor de Statistiek (CBS) tocante aproximadamente 460.000 alumno proveniente di 200.000 famia durante e periodo di 2006 te 2021. E investigacion a examina resultado di e test final di scol primario di mas cu 5.000 scol basico, e recomendacionnan di scol cu a ser duna, caracteristica di e alumnonan y nan trayecto educativo despues.

Coveney a indica cu el a keda sorprendi cu e influencia di e posicion di un mucha den su klas tabata asina grandi. Segun e, e no tabata spera cu e lugar cu un alumno ocupa den su klas lo ta asina decisivo pa e conseho escolar cu e ta ricibi. El a señala cu na Australia, di unda e ta bini, e seleccion pa diferente nivel di enseñansa ta tuma lugar na un edad mas avansa y no na final di scol primario.

E investigacion ta mustra cu e efecto aki ta mas fuerte cerca maestro cu tin mas experiencia. Segun Coveney, por ta cu e maestro, sin ripara, ta usa e posicion di un alumno den su klas como un punto di comparacion ora nan ta formula un recomendacion.

Otro posible splicacion ta cu comportamento di alumnonan tambe por hunga un rol. Segun e investigador, alumnonan cu ta socialisa cu compañeronan cu tin un prestacion hopi bon por mustra mas siguridad di nan mes, loke por influencia e evaluacion cu e maestro ta haci. Esaki por haci cu e maestro, conscientemente of inconscientemente, ta laga comportamento, seguridad personal y actitud di e mucha tin peso den nan decision.

Coveney ta di opinion cu conscientisa maestronan tocante e posible prehuicionan consciente y inconsciente por yuda reduci e efecto di e fenomeno aki.

E resultado di e estudio ta confirma conclusionnan di investigacionnan anterior cu a mustra cu algun grupo di alumno ta ser subestima regularmente den nan recomendacion escolar. Entre esakinan tin muchanan for di famianan cu entrada economico mas abao, alumno di regionnan rural, y studiantenan cu nan mayor no a completa un educacion superior na nivel HBO of WO. Tambe a constata cu mucha muhe ta ser subestima mas frecuentemente cu mucha homber.