(Infobae) – Un paper di e team FAIR di Meta ta mustra cu inteligencia artificial ya por anticipa e respuesta neuronal promedio di un grupo di hende cu mas precision cu e midimento real obteni den cada persona.

Pa decadas, neurociencia a progresa manera un arkeologo cu ta excava un ciudad region pa region: a descubri cu e area V5 ta procesa movemento, cu e giro fusiforme ta reconoce caranan, cu e area visual di forma di palabranan ta activa durante lectura. Tabata un mapa fragmenta, preciso den cada pida, pero incapaz pa splica con e cerebro ta integra tur esaki den un experiencia unico di e mundo.

Meta awo a publica un herment cu ta cambia esaki. Y loke nan a haya ta loke mester incomoda nos mas: e modelo ta pronostica e respuesta cerebral colectivo di un grupo di hende cu mas precision cu e respuesta individual real di cualkier di e suhetonan. AI no ta solamente modela e cerebro. Den termino estadistico, e ta super’e.

E experimento cu ningun hende no por a haci

TRIBE v2, publica pa e team FAIR di Meta dia 25 di maart 2026, ta ricibi video, audio y texto simultaneamente y ta pronostica actividad neuronal midi cu resonancia magnetico funcional (fMRI). E a ser entrena cu mas cu 1.000 ora di dato di 720 suheto expone na contenido real: temporada completo di ‘Friends’, documentario di BBC, pelicula cu historia largo y podcast.

Modelonan anterior tabata traha cu aproximadamente 1.000 voxel cerebral; TRIBE v2 ta opera cu 70.000. E diferencia ta entre sa den cual hemisferio algo ta activa y por mira exactamente cual region, cu cua patronchi, y den cua secuencia temporal.

E paradox cu e paper ta pone cla

Den e dataset di mas halto calidad disponibel pa ciencia, Human Connectome Project, registra cu un scanner di 7 Tesla cu 176 suheto, TRIBE v2 ta logra un corelacion cu e respuesta promedio di e grupo cu casi dobel e averahe di suheto humano individual.

Den otro palabra: si bo kier sa con e cerebro humano promedio ta responde na un escena carga emocionalmente of un frase compleho, e modelo di Meta lo duna bo un respuesta mas preciso cu cualkier cerebro real den e grupo ey.

E modelo ta siña e patronchi comparti bao di tur e variabilidad individual. Cada cerebro real ta agrega su mes “noise”: atencion, cansancio, historia personal… TRIBE v2 ta filtra esaki.

E laboratorio cu no mester suheto

E investigadornan a replica riba computer, sin ni un solo suheto den un scanner, algun di e experimentonan mas cita den neurociencia moderno. E area fusiforme pa cara. E area parahippocampal pa lugarnan. E lateralisacion pa hemisferio robes pa procesamento sintactico compleho. Decenas di investigacion empirico, reproduci den simulacion cu un corelacion estadisticamente significativo entre loke a ser pronostica y loke a ser midi.

E modelo nunca no tabata a mira e experimentonan aki. El a reconstrui nan pasobra el a siña algo mas profundo: e organisacion funcional di e cerebro humano.

Esaki tin un nomber: neurociencia in-silico. Y e economia di investigacion ta cambia. Cada sesion di fMRI ta costa centenares di dollar y ta rekeri instalacionnan specialisa. Cu TRIBE v2, un team por diseña y filtra experimento nan na computer prome cu reserva ni un solo minuut di scanner.

Loke e modelo ainda no por haci

E papel ta honesto: TRIBE v2 ta trata e cerebro como un observador pasivo di estimulo. E no ta modela e cerebro como un agente cu ta dicidi, actua of ta corda cosnan a largo plaso. fMRI ta midi fluho di sanger, no disparo neuronal directo.

Loke e modelo ta pronostica ta un aproximacion temporalmente suavisa di loke ta pasa den e corteza. Preciso. Pero ainda un aproximacion.

Pakico esaki ta importa mas cu solamente den laboratorio

Meta a publica e modelo, codigo y “weights” bao di un licencia pa uso no-comercial. Teamnan na universidadnan Latino Americano cu no tin acceso na scanner di 7 Tesla awo por usa TRIBE v2 pa diseña experimento nan y acelera investigacion riba condicionnan cu ta afecta e region desproporcionadamente: ACV, epilepsia, y deterioro cognitivo.

Pa 100 aña, neurociencia a construi mapa parcial. TRIBE v2 ta propone integra nan den un solo mapa. E mes autor nan a formula esaki sin hopi modestia: e resultadonan aki ta establece inteligencia artificial como un marco unificador pa explora e organisacion funcional di e cerebro humano.

Ningun hende ainda no sa kico lo ser descubri cu e mapa completo ey. Loke nos sa ta cu un sistema di AI a acaba di mustra cu e ta comprende con e cerebro humano ta responde na experiencia miho cu cada cerebro individual por representa su mes. Esaki no ta un alarma; ta un pregunta cu ciencia lo tuma decadanan pa termina contesta.