(AP) – E compania Meta, doño di Facebook y Instagram, a crea un sistema di inteligencia artificial cu ta rival di entre otro ChatGPT y Google su Bard, sinembargo nan ta tumando un otro ruta; Esaki lo ta gratis.
Meta su CEO Mark Zuckerberg a bisa diamars cu e compania lo bira partner di Microsoft pa asina introduci un proximo generacion di su modelo di lenguahe di AI y haci e tecnologia, conoci como Llama 2, gratis pa uso comercial y di investigacion.
Di mesun manera cu su coleganan den e industria Google y Microsoft, e compania di rednan social tin hopi tempo cu un ekipo grandi di cientificonan di computer dedica na avansa e tecnologia di inteligencia artificial. Sinembargo esaki a keda tapa, mirando cu e lansamento di ChatGPT a crea un careda pa genera ganashi cu hermentnan di “inteligencia artificial generativo” cu por crea imagennan, texto y otro media nobo.
Meta tambe a purba distingui su mes pa medio di ta hopi mas habri cu su otro rivalnan den tecnologia grandi pa medio di comparti un bista di e data y codigonan usa pa crea nan sistemanan di inteligencia artificial. Tambe a argumenta cu e manera di traha aki ta haci hopi mas facil pa investigadornan exterior por identifica y mitiga e toxicidad y preferencia cu e sistemanan di inteligencia artificial ta crea pa medio di ingeri con personanan real ta skirbi y comunica.
“E manera aki di traha ta genera innovacion pa motibo cu e ta permiti hopi mas desaroyador crea cu un tecnologia nobo,” Zuckerberg a bisa den un publicacion riba Facebook diamars. “Tambe esaki ta mehora siguridad pa motibo cu e programacion ta habri, hopi mas hende por evalua esaki pa identifica y drecha problemanan potencial. Mi ta kere cu esaki lo trece mas progreso si e ecosistema tabata mas habri, cual ta e motibo dicon nos ta lagando Llama 2 habri.”
E reportahe di investigacion cu ta introduci e model nobo aki ta refleha un manera di traha menos habri compara cu loke Meta a mustra anteriormente den su trabao pa construi modelonan cu ta rekeri ingeri cantidadnan grandi di texto manera bukinan, articulonan di noticia y publicacionnan riba rednan social. Tambe ta bisa cu e model mas recien a ricibi training cu “un mescla di data for di fuentenan disponibel publicamente, cual no ta inclui data for di Meta su propio productonan ni servicionan,” pero no ta specifica ki data si a ser usa. Loke si ta bisa ta cu Meta a kita data for di websitenan cu ta conoci pa contene “un cantidad halto di informacion personal y priva di individuonan.”
Meta ta usa e nomber LLaMA, Large Language Model Meta AI, pa describi e prome version di su model, anuncia den februari. Awo a ahusta e nomber pa e di dos version, cual a haya e nomber Llama 2.
Segun Zuckerberg, hende por descarga e model nobo di inteligencia artificial directamente of via un partnership cu ta haci esaki disponibel riba Microsoft su plataforma Azure “conhuntamente cu Microsoft su hermentnan di siguridad y contenido.”
