Un inmigrante Mexicano di 31 aña a keda riba lista oficial di victima fatal di horcan Harvey.
Despues cu el a muri, siman cu a pasa na Galveston, Texas, informe medico a duna cu causa di su fayecimento ta un ‘fascitis necrosante’, cu ta un infeccion riba su cuero cu el a haya pa e presencia di un bacteria carnivoro.
Josué Zurita, Mexicano a haya e bacteria, ora cu e tabata traha como carpinte den reparacion di varios cas, cu a keda destrui den e inundacion cu horcan Harvey a ocasiona.
Distrito di salud di Galveston a informa cu Zurita a bay hospital dia 10 di october cu un infeccion serio riba su brasa y cu el a muri seis dia despues.
E infeccion cu e persona aki a haya a penetra den su curpa, ora cu bacteria y sushi a penetra un herida of corta cu e tabatin, asina Philip Keizer, medico di distrito di salud di Condado di Galveston, a splica.
“E enfermedad aki ta straño, y e situacion aki ta hopi tristo y dificil pa e famia di Zurita,” Philip Keizer a splica.
Segun Centro pa Prevencion y Control di Enfermedad (CDC su sigla na Ingles), e enfermedad cu ta tecnicamente conoci como “fascitis necrosante” ta un infeccion bacterial grave riba cuero, y cu ta contagia rapidamente tur tehido moli di e curpa, p’esey e bacteria ta resulta mortal den poco tempo.
Un amigo di Zurita a informa cu e Mexicano aki a yega Merca 12 aña pasa, tempo cu el a dicidi di emigra, pa busca oportunidad pa su famia. El a laga su casa y yiu na Mexico, tempo cu el dicidi bay Galveston.
“E tabata un persona cariñoso” Brenda Avalos, casa di su primo a bisa. “E tin hopi amigo na Galveston cu ta stim’e. Tur hende ta hopi tristo. E tabata hoben y semper e tabata hari cu tur hende.”
Autoridadnan na Texas tin mas di 80 fayecimento relaciona cu horcan Harvey den e area cu a keda afecta pa inundacion.
Harvey a yega na tera dia 25 di augustus como un horcan di categoria 4, banda di Corpus Christi y a causa inundacion den area di Houston y sur di Texas.
