(Valora Analitik) – Fin di siman ultimo a reporta un explosion na un plataforma di Petroleo Mexicano (Pemex) cu a reduci e produccion di crudo di e compania pa 44.000 bari di petroleo pa dia (bdp) den e 125 pos productor di e compleho Ku-Maloob-Zaap, cu a keda comprometi pa via di e accidente.
E plataforma no ta habilita, y ta p’esey cu no por sigui saca crudo tanten lo caba cu labor di contesta di e incidente. E director di Pemex, Octavio Romero a bisa cu e compania ta traha pa establece, lo mas pronto posibel, e produccion di petroleo.
E suceso a wordo reporta na centro di Proceso Ku-A, na instalacion di comprension y generacion electrico E-Ku-A2 cerca di Ciudad del Carmen. Te ayera e incidente a laga cinco persona fayecido, seis persona herido y dos desaparecido.
Entre e victimanan fatal ta un trahado di Pemex y cuatro colaborado di e compania Cotemar, nan tabata realisa labor di mantencion. E compania a sigura cu un di e persona herido ta na estado grave.
E candela a cuminsa den oranan di atardi di diadomingo ultimo y despues a wordo controla. E director di Pemex a defende cu e suceso no tabatin relacion cu falta di mantencion of falta di ekiponan den e zona, sino cu a aclaria cu tabata trata di “un accidente”.
Segun Romero, candelanan tin relacion cu sucesonan imprevisto y cu “na ningun caso tin di haber cu descuido”, el a agrega cu, ora e tipo di hecho aki ta sucede pa falta di mantencion, compania di seguro no ta cubri e gastonan. E secretaria di Energia di Mexico, Rocio Nahle, a manda condolencia na famia di e victimanan.
Despues di e candela, prijsnan internacional di petroleo a registra movemento importante. E bari na referencia di brent a marca 68,26$ ganando 0,04% na transaccion pa entrega di november di 2021.
