Direccion General di Aeronautica Civil a forma un ekipo internacional cu lo ta encarga cu esclarece e causa di e accidente di helicopter den cual e gobernador di estado Puebla, Martha Erika Alonso y su esposo, e senador Rafael Moreno Valle tabata biaha, asina e subsecretario di Secretaria di Comunicacion y Transporte, Carlos Alfonso Morales a declara. Tambe a fayece tres persona cu tabata forma e tripulacion di e helicopter.
Morales a splica cu e ekipo ta integra pa representante di e fabricante Italiano di e aparato y di e productor Canades di e motor di e helicopter, como tambe pa inspectornan di verificacion di accidente aereo, pa no laga “cabos sueltos” den e investigacion.
“Nos tin instruccion preciso di presidente di republica di conta cu e miho investigadonan internacional, pa cual a establece contacto cu e Conseho Nacional di Siguridad den Transporte di Estadonan Uni (National Transportation Safety Board, NTBS), cu ta e institucion di mayor reconocimento internacional den materia di investigacion di accidente”,el a bisa den conferencia di prensa.
E secretario di Siguridad y Proteccion Ciudadano di gobierno di Mexico, Alfonso Durazo, a haci un yamada na e poblacion en general pa no difundi informacion o hipotesis falso encuanto e caida di e helicopter den cual e dos politiconan di Partido Accion Nacional (PAN) tabata biaha.
Na juli di e aña aki e gobernador tabata involucra den un investigacion pa posibel fraude den eleccion pa gobernador di estado Puebla. Esaki no a impedi su nombramento como gobernador, como sucesor di su esposo.
