(EFE) – Departamento di Husticia a anuncia cargonan na tres districto federal contra varios supuesto lider di Cartel de Sinaloa, entre nan e di cuatro yiu di Joaquin “el Chapo” Guzman, pa trafico di fentanilo y otro tipo di droga.
Den un comunicado, fiscal general di Merca, Merrick Garland, a destaca cu e accionnan ta bay dirigi na e “mayor y mas abundante operacion di trafico di fentanilo na mundo,” dirigi pa e cartel aki y “alimenta pa companianan farmaceutico Chines.”
E cargonan na diferente districto federal di sur di New York, na nort di Illinois y Districto di Columbia ta contra casi trinta hende, incluyendo e di cuatro yiu di el Chapo. Segun e comunicado, tin shete acusado bao custodia, aunke nan no a duna detaye di ken nan ta.
E accionnan, segun e gestor di Agencia Antidroga Mericano (DEA na Ingles), Anne Milgram, a manda e mensahe “claro na e Chapitos, e cartel de Sinaloa y e rednan criminal di droga rond di mundo cu DEA no ta bay stop pa protege e siguridad nacional di Merca y di e Mericanonan.”
Chapitos ta e di cuatro yiu di Joaquin Guzman, ex-dirigente di e cartel aki conhuntamente cu Iván Guzmán Salazar (40), Alfredo Guzmán Salazar (37), Joaquín Guzmán López (36) y Ovidio Guzmán López (33).
Departamento di Husticia ta apunta cu presuntamente nan a usa varios avion di carga, aeronave priva, submarino y otro embarcacion, asina como porta container, botonan rapido, busnan, trein, entre otro pa por transporta nan droga y kimiconan.
Departamento di Estado,a traves di su Programa di Recompensa contra Narcotico, ta ofrece un recompensa di hasta 10 miyon dollar pa informacion cu lo conduci na aresto of condena di Ivan, Alfredo y Ovidio Guzman, hasta 5 miyon dollar pa Joaquin.
Cartel de Sinaloa, segun Merca, ta e cartel narcotraficante “mas poderoso na mundo” y e responsabel di gran parti di e produccion y fabricamento di fentanilo pa su distribucion na Merca.
