(Infobae) – Un mucha di apenas 12 aña, y burachi, tabata maneha un auto cu velocidad halto, a perde control, dal den un muraya, despues den un mata. Den e vehiculo tabatin nuebe hoben cu tabata bolbe di un fiesta di carnaval.
Cinco di nan a muri y tres adolescente ta hospitalisa den estado grave. E hoben conductor, identifica como Luis Eduardo, cu segun e prome averiguacionnan tecnico tabata maneha e auto na mas di 120 kilometro pa ora, milagrosamente no tabatin herida di gravedad, pero lo mester enfrenta huicio dilanti un tribunal pa menor. E fayecidonan tabata un mucha muhe di 12, dos mucha muhe di 13, otro menor di 12 y un di 14 aña, di acuerdo cu e informe preliminar di autoridad.
E accidente a sucede na un zona yama Rancho las Bugambilias, den municipalidad di Tlahuac. Dentro di e vehiculo a haya varios boter di bebida fuerte, y varios di e victimanan tabata studiante di mesun scol publico.
Procurador no sa ainda na ken e vehiculo ta pertenece y pakico un mucha por a presta esaki, o cu el a bay cu esaki sin permiso. Autoridadnan a señala cu e adulto cu ta propietario di e auto ta enfrenta un responsabilidad penal.
E caso impactante, cu a keda hopi comenta den tur medio principal, a pone den evidencia e gravedad di e creciente fenomeno di alcoholismo entre adolescente na e pais. Esaki ya a keda señala den e ultimo informe di e Comision Nacional contra Adiccion, difundi algun luna pasa.
Segun e encuesta nacional di consumo di droga, alcohol y tabaco, difundi na september pasa, consumo di droga y alcohol a aumenta entre e poblacion adolescente (di 12 pa 17 aña) cu 78% entre hende homber y cu 222% entre hende muhe, di 2010 pa 2016.Segun estadistica di ministerio di Salud, accidente di trafico ta e prome causa di morto di mucha entre 5 y 14 aña y e di dos entre hoben di 15 pa 29 aña.
