(NTN24) – Por lo menos 10 persona a muri y un dozijn mas a resulta herido diadomingo ultimo despues cu e dak di un misa catolico a cay ora tabata celebrando un bautismo na Ciudad di Madero, na estado Mexicano di Tamaulipas.
E tragedia a registra casi 2or di atardi na momento cu casi 70 persona tabata asisti na un bautismo.
“Lamentablemente ta confirma cu 10 persona a fayece. Di nan cinco ta hende muhe, dos hende homber y tres mucha,” Americo Villareal gobernador di Tamaulipas a bisa despues cu a bishita e luga di e tragedia.
El a splica cu te ayera mester a recupera e curpa di un persona entre tur e restonan di material cu a cay y cu probablemente no tabatin mas victima debi cu a localisa personanan cu a reporta como desaparecido.
Villareal a agrega cu a duna atencion medico na casi 60 persona pa diferente herida, di e cual 23 tabata den hospital. “Dos cu lesion grave, cu nan bida por ta den peliger.”
Di loke ta trata e collapse di e dak, el a bisa cu segun e pastoor encarga nan no a haya fayonan den e misa aki estilo industrial cu a ser construi 50 aña pasa.
Tambe a splica cu “tur diadomingo tabata special pa e celebracion di bautismo, pa loke famianan henter tabata asisti na e luga aki.”
Den imagennan di algun medionan por a mira personanan cu tabata purba di sostene cu palonan e parti di structura cu a collapse mientras otronan tabata busca nan famianan.
E zona tabata rondia pa varios ambulance, patruya, polis y militarnan, ademas di hopi hende cu tabata yega den busca di nan famia cu tabata na e misa.
