E ultimo deseo di e mama di Sofia tabata pa nan strooi su shinishi na e pais na unda e la nace. Hunto cu su 4 amiga, Sofia ta dicidi pa cumpli cu e deseo di su mama y ta sali di biahe rumbo pa Colombia. E biahe cu na prome instante ta mustra di bira uno placentero, no ta bay manera plania. E amiganan ta haya nan mes confronta cu diferente reto cu ta test nan amistad y tambe nan curashi.

E obra teatral aki titula “Amiganan pa Semper” ta un obra skirbi, produci y dirigi pa Faritah Luidens. Luidens no ta un personahe desconoci den mundo di arte y teatro na Aruba. Un cantante, comediante, actriz y escritora cu tin un trayectorio artistico desde cu e tabatin apenas 17 aña di edad.

Luidens a cuminsa cu canto y despues a drenta den e mundo di teatro. Hopi ta conoce Luidens como e personahe humoristico ‘Tica Basha Abao’, pero su soño tambe tabata pa cuminsa skirbi obranan di teatro. No solamente cu e meta pa promove teatro, pero tambe pa invita otro pa sigui nan soño y asina tambe aporta na arte y cultura na Aruba. Despues di 2 aña dedicando su mes na su soño, su prome obra ‘Amiganan pa Semper’ ta cla pa presenta den luna di september.

Luidens a splica durante un conferencia di prensa cu el a skirbi e obra di teatro aki durante un aña largo. El a scoge e titulo ‘Amiganan pa Semper’ pasobra mi e ta pertenece na un grupo di amiga y esey a dun’e e idea. El a scoge Colombia pasobra e ta biaha pa Colombia constantemente y semper aki aya tin cierto cosnan cu el a pasa aden y a traves di e experiencianan aki el a haci un combinacion pa e obra.

Luidens mes ta dirigi y produci e obra aki, y como actriz e sa e importancia di un bon elenco. Un elenco cu tin alrededor di un aña practica y prepara e obra y desde comienso a dedica nan mes na e obra. E elenco ta consisti di Nilka Franka, Lilian Pieters, Amy Richards, Faridi Daou, Meredith Rafael, Edjean Semeleer, Israel Luidens y Jason Croes.

“Di mes mi no por a drumi sin pensa cu e cos ki mester bay door y mi a bisa mi kier crème de la crème. Mi a cuminsa busca esnan cu ami ta considera actornan fenomenal y esey ta e elenco cu nos tin. E ta un obra completamente diferente, e tin tur cos y p’esey mi ta bisa e ta algo completamente diferente y a bira tempo pa apoya nos mesun hendenan y nos tin actornan fenomenal riba e isla aki”, el a agrega.

Edjean Semeleer, integrante di e elenco di ‘Amiganan pa Semper’ ta conta cu e experiencia ta algo completamente diferente p’e y cu a sak’e full for di su zona di comfort. “E prome biahanan e tabata hopi incomodo pa por a haci esaki, pero pa loke mi a mira e protagonistanan desplega, mi ta haya ta fantastico. E obra mes, e forma cu el a wordo hinca den otro y bo por relaciona cu hopi di e situacionnan”, el a expresa.

El a remarca cu ‘Amiganan pa Semper’ ta un obra teatral den cual humor ta bay resalta hopi y cu e publico lo experiencia hopi tipo di emocion, manera rabia, nostalgia, pero humor ta loke mas ta bay prevalece durante obra aki.

Semeleer a sigui conta cu durante e ratonan cu e no mester actua, por a sinta disfruta di e actuacion fantastico di a protagonistanan. “Pa mi como artista ta un honor di forma parti di e obra aki. Mi ta hopi sigur cu e publico lo disfruta y sinti hopi inspira y motiva pa mira cu tin iniciativanan cu ta wordo tuma pa stimula mas teatro riba nos isla”, el a subraya.

Rayenne Hernandez, directora UNOCA, tambe tabata presente durante e conferencia di prensa y den nomber di UNOCA el a expresa cu nan ta orguyoso di por presenta y forma parti di un proyecto asina.

Hernandez a enfatisa cu hopi biaha presentacionnan, obranan teatral di afo ta haya hopi sosten di comunidad y como UNOCA nan ta kere cu e obranan local, e artistanan di Aruba tambe tin talento pa presenta na caliber internacional y esaki ta un di motibonan pakico UNIOCA a dicidi di sostene financieramente e proyecto di Faritah Luidens.

“UNOCA ta kere den desaroyo di arte, desaroyo di cultura y e parti di teatro nos a wak cu e ultimo añanan no ta ricibiendo e balor cu e merece, no ta ricibiendo e sosten di comercio y nos si ta dicidi, hunto cu algun otro partner, pa sostene e proyecto aki pa nos wak nos mesun talentonan local tambe riba escenario pa comunidad di Aruba disfruta”, el a finalisa.

E obra ‘Amiganan pa Semper’ lo tuma luga dianan 2 y 3 di september den Cas di Cultura.

LEAVE A REPLY

Please enter your comment!
Please enter your name here