Diahuebs dia 18 di december un publicacion di Micky’s Foundation a surgi riba Facebook unda e fundacion a anuncia cu lo descontinua e provision di fisioterapia pediatrico. Esaki en conexion cu un falta di fondo pa terapistanan duna servicio adecua.
Segun e fundacion ta splica, e decision aki lo bay na vigor cuminsando dia 1 di januari. E fundacion a lamenta e decision aki, yamando e “dificil, pero ambos necesario y anticipa.”
“Ta tempo pa Gobierno di Aruba, HOH y AZV porfin asumi responsabilidad completo pa protege e necesidadnan terapeutico di e grupo di mucha mas vulnerable riba e isla.”
E fundacion a enfatisa cu a comunica e decision aki na aproximadamente 100 mayor di muchanan cu transtorno neurologico severo. E anuncio a causa gran preocupacion. Manera a conta den e publicacion, algun mayor a expresa sentimentonan di derota, hasta considerando pa muda bay Hulanda pa asina por haya e cuido necesario pa nan yiunan. Otronan a responde cu determinacion y un yamado pa accion colectivo. Manera e fundacion ta bisa, e reaccionnan aki ta subraya ambos e gravedad di e situacion y e necesidad urgente pa solucion structural.
E fundacion a afirma cu e lo keda hunga un rol strategico. A subraya cu lo keda resiliente y determina pa boga pa e derecho y interesnan di e muchanan aki y nan famia, di ken nan necesidad a keda neglisha pa institucionnan oficial pa mucho tempo. E fundacion ta haci un yamado na autoridadnan riba e isla pa asumi responsabilidad cu en principio tabata di nan pa cuminsa. E fundacion a splica cu nunca tabata su responsabilidad pa provee rehabilitacion pediatrico riba un base structural. Sinembargo e fundacion crea pa mayornan pa asisti otro mayornan a tuma iniciativa pa cera e buraco aki durante e ultimo 11 aña, y a logra yuda 140 mucha y provee 14.000 ora di terapia cu e ayudo di 40 fisioterapista pediatrico. Tur proyecto tabata organisa pa boluntarionan, tur terapia tabata gratis y tur iniciativa a ser financia pa sponsornan.
A splica cu a manda un carta na minister di Salud, Mervin Wyatt-Ras, prome minister Mike Eman y director di AZV Edwin Jacobs, como tambe e presidente di directiva di HOH, Jacco Vroegop. Den su carta, e fundacion a pidi pa accion inmediato. Mientras e fundacion ta reconoce cu procesonan gubernamental por ta lento, e tin e speransa cu por logra cambionan significativo cu ayudo y sosten di famia, sponsor y tur individuo cu ta reconoce e urgencia di e asunto aki.
Pa clausura su anuncio, Micky’s Foundation ta confirma cu den 2026 e lo sigui provee terapistanan den tereno di terapia ocupacional y discurso pre-verbal.
