E tension creciente entre Venezuela y Merca un biaha mas ta lanta preocupacion na Den Haag. Miembro di Parlamento Ralf Dekker (FVD) a entrega preguntanan na Minister di Asuntonan Interior y Relacionnan den Reino demisionario, Frank Rijkaart, y Minister di y Asuntonan Exterior demisionario, David van Weel, tocante e impacto potencial di e situacion riba Aruba, Corsou, Sint Maarten, y e municipionan special.

E preguntanan ta bin na momento cu Venezuela un biaha mas ta desplegando un aumento di actividad militar y e tono diplomatico entre Caracas y Washington ta bira mas fuerte. Pa e islanan Caribense di Reino, cerca di e continente Venezolano, esaki ta trece recuerdonan di periodonan anterior di instabilidad den cual Aruba y Corsou a sinti e consecuencianan inmediato.

Parlamentario Dekker a puntra e gabinete con ta evalua e situacion actual y ki riesgonan tin pa e partinan di Reino den region. E kier sa si tin contacto activo entre Den Haag y e gobiernonan di Aruba, Corsou, y Sint Maarten, y kico gobierno ta considera e riesgonan inmediato di seguridad.

Ademas, e parlamentario di FVD ta lanta preguntanan tocante e posibilidad di fluhonan di migracion nobo. Durante crisisnan anterior, miles di Venezolano a bin Aruba, poniendo un presion significativo riba capacidad di recepcion, cuido medico, y aplicacion di ley. Tweede Kamer kier sa si tin indicacion cu un situacion asina por surgi atrobe y si gobierno ta preparando pa un posibel fluho.

Tambe Dekker ta puntra ki interesnan strategico Hulanda y e islanan tin den e conflicto cu ta escalando y con gobierno tin pensa di evita cu “sin intencion ta bira un partido” di e tensionnan entre e potencianan grandi, mientras cu toch ta garantisa e seguridad di Reino.

Aruba su ubicacion y tamaño geografico ta haci’e particularmente vulnerabel pa desaroyonan geopolitico. E ta solamente 27 kilometer leu for di Venezuela. Durante e peak di migracion di 2016–2019, e consecuencianan a ser sinti mesora riba e isla: fluhonan di migrante via lama, presion riba Wardacosta y Polis, refugio di emergencia y ayudo humanitario, y efectonan economico debi na interupcionnan den comercio regional.

Aunke ainda e ministernan no a contesta e preguntanan, recientemente minister demisionario Rijkaart papiando den e programa Hulandes, WNL Op Zondag, a bisa cu e ta tene cuenta cu “tur escenario”, describiendo e situacion como un den cual cautela – no complacencia – ta esencial. Maske e islanan ta keda trankil pa awor, el a bisa cu gobierno ta observando e desaroyonan “cu wowo skerpi,” agregando cu lo ta iresponsable pa actua como si tensionnan regional ta leu di Caribe Hulandes. “No ta e intencion pa e islanan haya nan mes involucra den plannan di Trump,” e minister a bisa, enfatisando cu mantene stabilidad ta su prioridad top.

Ta conoci cu durante crisisnan regional anterior, e comunicacion entre Den Haag y e islanan tabata estrecho. Pa Aruba, ta specialmente importante pa Den Haag duna un bista na tempo riba analisisnan di riesgo, pa asina e isla no keda sorprendi pa desaroyonan of analisisnan cu solamente ta ser comparti despues di e hecho.

Un escalacion di tensionnan entre Merca y Venezuela por trece no solamente riesgonan di seguridad pero tambe retonan economico y humanitario: interupcion di comercio y envio, perdida di confiansa di turista pa motibo di reportahe internacional negativo, presion riba negoshinan chikito y importacion, y aumento di presion riba organisacionnan local di ayudo.

Experiencia di Aruba den pasado ta mustra cu por sinti cambionan na Venezuela casi mesora den prijs di cuminda, disponibilidad di producto, y movementonan di migracion.

FVD kier pa e gabinete entrega un analisis di riesgo actualisa na Tweede, delineando scenarionan pa seguridad, migracion, economia y relacionnan diplomatico. Documentonan asina por lo general ta keda parcialmente confidencial, pero segun e Parlamentario, un version publico por ta necesario pa transparencia pa cu e paisnan autonomo.