Ayera mediante un comunicado di prensa, Otmar Oduber y Eduard Pieters, miembronan di partido PPA, a comparti imagen y informacion di nan bishita na e hotel Secrets na San Nicolas. Segun Oduber, e hotel “lo tin un gran impacto positivo riba e comunidad local y specialmente di San Nicolas y bisindario.”

Den e comunicado di prensa, Oduber a nota cu for di tempo cu e tabata minister pa partido di AVP, el a cuminsa cu e lucha pa un hotel di calidad y renombre internacional pa San Nicolas. E tempo ey el a inicia cu Bahia Principe, unda hasta tabatin un MoU, letter of intent, firma, pero na caminda desaroyo a cambia. “A tuma varios aña di negociacion, sosteni pa hopi rapport tecnico di AIB y PWC pa ilustra e beneficio pa Aruba. Mi no a perde fe y confiansa y mi a sigui lucha y busca te ora mi a haya e grupo adecuado, cu ta kere cu lo bira un bon bisiña pa Aruba,” Oduber a agrega.

“Seis aña pasa nos a bay Republica Dominicana pa convence e desaroyadornan y inversionistanan. E grupo Martinon ta esun adecua y awor cu nan a haya Hyatt como e cadena hotelero cu lo bay oper’e, Aruba y San Nicolas a gana,” segun Oduber.

E parlamentario a nota tambe cu Secrets Baby Beach ta bay tin su apertura oficial dia 5 di juni proximo.

Oduber a comenta cu tin casi 700 Arubiano trahando riba e tereno, y cu e hotel “lo genera mas di 300 empleo fiho, creando un efecto enorme di economia den henter e zona.” Segun Oduber a indica, cu e apertura di e hotel aki, “pueblo mes por wak mi vision.”

Di su banda, Eduard Pieters di PPA a comenta cu “e impacto di e hotel Secrets Baby Beach Aruba na San Nicolas, lo bay hopi mas leu cu solamente empleo.”

Pieters ta papia di un efecto domino cu por cambia San Nicolas y vecindario completo: desde empleo local, brindando mas seguridad, incorpora infrastructura basico, cu ta e prome paso pa un ‘orange economy’ vibrante. Segun Pieters, e peticion di San Nicolas Business Association ta hopi cla: inicialmente nan ta pidi luz, verf y mata pa dorna desde promenade bay pariba, specialmente unda e turistanan lo pasa. “Esaki no ta costa gobierno hopi, pero lo duna un sensacion di dignidad y invitacion pa bin pariba. E infrastructura mester sigui desaroya,” Pieters a declara.

Na mesun momento PPA ta lamenta masha, cu durante e town hall meeting, Sr. Pieters tabata e unico representante politico activo presente. Pieters ta pone enfoke riba responsabilidad di gobierno pa sigui cu un plan integral pa infrastructura, seguridad y stimulacion di emprendemento local.

“Tur hende ta papia di diversificacion, pero ora bo wak cu un zona completo no ta haya ni un 1% di bo economia turistico, nos mester actua,” el a bisa den e comunicado.