Directornan di ELMAR y WEB a sinta hunto cu Director di Utilities pa coregi locual a bay fout den cobranza di awa y coriente. Asina Minister di Energia, Glenbert Croes a bisa for di Ecuador. E Minister a bisa cu Gobierno a aproba un aumento di 24 porciento, pero “e recibonan cu a sali no a refleha esey y hendenan cu razon, a mira nan recibo bay extremadamente halto. Esey no ta locual Gobierno a aproba,” Croes a bisa.
E discusion den comunidad ta riba e aumento di practicamente 100 porciento di nan cuenta di coriente. Pa hopi hende e tabata un shock pa keda confronta cu mester paga dos biaha locual tabata paga prome pa nan uso di coriente. Tambe personanan cu tin e asina yama smart meter, cu ta e sistema digital cu ta registra e uso. Den exterior, incluso Hulanda tabatin hopi problema cu e registro di uso di coriente pa motibo cu e smart meters tabata haci fout y den cierto caso tabata hasta cobra tres biaha mas cu locual a consumi na electricidad. For di 2019 caba, Universidad di Twente mustra cu tin smart meters cu ta duna registracion robes di e consumo.
E cientificonan a nenga di nombra e marcanan, pero e fayonan tabata sinta den e diseño di e meternan, ademas cu uso di luznan LED, otro aparato cu ta abao den uso di coriente a keda identifica entre otro motibo di e registro robes. Universidad di Twente a mustra cu particularmente e sistema di ‘dimmers’ pa luz tabata afecta e funcionamento di e dimmer of otro aparato electronico moderno (multimedia). Den e test cu Universidad di Twente a haci, a mustra cu cinco di nuebe smart meter tabata registra mas cu locual a consumi na coriente.
Na Inglatera, e uso di e smart meters a conduci na un averahe di 42 porciento den uso di coriente registra. Tabata hasta un caso di un persona cu su meter a registra 30mil libra na consumo di coriente riba un solo dia.
Professor Leferink di Universidad di Twente a bisa cu sa desde 2009 caba cu meternan electronico por duna registro mucho abao, pero cu tabata pa prome biaha a mira cu nan ta registra un consumo mucho halto. “Nos a haci nos investigacion den un laboratorio. Si mira e situacion na cas di hende, no por asumi cu e diferencia ta entre 5 pa 600 porciento. Pero locual nos a mustra si ta cu e registro di e meter ta diferencia hopi di locual e consumidor ta gasta na coriente,” Leferink a bisa.
Segun Audrey Croes, vocero di NV Elmar, e ta conoci cu cierto smart meter por duna registro robes, particularmente e smart meters cu ta usa un tipo di waya, esta e Rogovski Coil. Pero “NV Elmar no ta usa e tipo di meter electronico aki.”
Tabata e mesun Universidad di Twente hunto cu Hogeschool di Amsterdam a descubri cu e meternan electronico cu ta usa e waya aki ta registra un uso exagera di coriente. Ta e estudio aki di 2017, a haci cu e team bao Leferink a bolbe haci mas investigacion na 2019. E tema a bolbe bin den noticia siman pasa na Hulanda, na momento cu e compania di electricidad Eneco a admiti cu tin problema den comunicacion cu e meternan digital cu ta haci posibel cu por registra consumo robes. Segun e website Energievergelijk.nl, calidad di e meternan electronico ‘sabi’ esta smart meters ta bao nivel. Consecuentemente hogarnan ta por paga demasiado na coriente.
Basa riba e midimento di e calidad di e red, na Hulanda esnan cu meter ‘sabi’ tin biaha ta paga pa consumo cu ta hasta tres biaha mas hopi cu a usa. E problema, segun e website, ta cu e calidad di e meternan ta malo. Na Hulanda, tur aña ta descualifica riba 10 mil meter sabi, mientras cu Universidad di Twente mes ta bisa cu na cuater di cada 24 meter sabi no por garantisa cu e saldo final ta cuadra. Pa tal motibo mes, expertonan na Hulanda ta bisa cu mester ta mas proactivo na nivel individual pa midi si e meternan ta traha bon.
Particularmente pasobra e meternan sabi ta tuma e momentonan piek di consumo. Ta conseha pa controla si berdad tin un diferencia den consumo, si a trece cambio den e aparatonan cu ta usa coriente. Si no por splica e diferencia den consumo, e website ta conseha pa e proveedor bin haci un analisis di e uso di coriente na cas.
“Pero Rogovski Coil cu a crea hopi problema no ta relevante pa nos, pasobra ELMAR no ta usa e tipo di smart meter aki. Riba dje, nos ta haci ‘spot checks’ regular,” Croes a splica. Ta midi e calidad di e meter a base di un aparato special. “No mester ‘ijk’ un smart meter.”
E factornan cu a conduci na consumo di coriente mas halto tabata e calor excesivo, e vocero di Elmar a bisa. Hasta si consumidornan no a haci mas uso di nan airco, of a pone e airco traha mas friu, e por a gasta mas coriente. Unabes e diferencia entre e temperatura pafo y di paden ta mas cu ocho (8) grado, e airco ta ranca mas coriente, sin cu esey ta e intencion di e consumidor, Audrey Croes a splica.
Di otro banda, tabata Minister Glenbert Croes kende ayera a bisa specificamente cu tabatin un fout cu a sucede. “Directornan di WEB, Elmar y Utilities ta na mesa pa traha riba coreccionnan di locual a bay fout. Mi ta agradecido cu nan ta trahando cu nan expertonan pa coregi e asunto aki pa nos alivia e situacion pa nos pueblo. Nos ta bibando un crisis energetico y su impacto riba costo di bida. Nos tur ta haciendo un esfuerso, pa nos pais, pueblo y economia sobrevivi. Companianan estatal tambe mester sobrevivi y recibonan manera nan a sali no ta pagabel. P’esey mester bin coreccion.”
A informa Sra. Audrey Croes di e declaracion di Minister Croes pero e vocero di Elmar no a bisa nada riba e ponencia cu tabatin un fout den e registro di consumo. El a informa si cu si tin duda, ciudadanonan por acudi na companianan specialisa den electricidad na Aruba, pa asina nan por bin controla.
Minister Croes di su banda ta na Ecuador, segun e, pa logra cu aki 30 luna WEB ta opera full riba gas, y cu esaki lo baha prijs di awa y coriente.
