Den e dianan aki nos ta hayando claridad na kico e maneho desastroso y absolutamente carente di sentido encuanto piscamento cu harpun lo a yega, ya cu no a para e locura organisa pa dos ministro, cu mester por sa mihor. Ora cu oposicion den parlamento contra e intencion di e dos mandatarionan a fracasa, y cu apoyo firme di banda di e partidonan cu ta sostene e coalicion, ignorando tur argumento y hasta sacrificando un di nan propio ministronan den e proceso, tabata mas cu cla cu supervision riba e practica di pisca cu harpun, specificamente tambe riba especienan cu tin proteccion di ley, lo tabata bay tin su retonan. Al fin y al cabo, e cuerponan supervisor no por ta tur caminda.

Nos no por a pensa sin embargo cu e afan di hiba un maneho desastroso di e mandatarionan tabata bay asina leu cu lo a bay haci uso di un investigacion bao di especienan protegi, pa seguidamente duna instruccion pa suspende supervision di e cuerponan uniforma cu ta encarga cu esaki. Manera bisa, e supervision no por ta tur caminda, ya cu e tareanan di supervision di narcotrafico y traficacion di hende ta nan prioridad, cu e logico consecuencia cu e areanan marino cu ta designa como area di proteccion, no por conta cu e supervision necesario. Aki ta parce cu e fayo grandi ta: e ministronan di Husticia y di Pesca no a percura pa un supervision mehora, como medida logico ora bo ta habri mas posibilidad cu hende ta bay cas cu especienan protegi. Loke nan a logra cu nan accion hunto cu mayoria di parlamento, ta keda sin crea e supervision extra cu nan debe comunidad, como contrapeso pa e peligro pa mas daño na naturalesa pa via di e grupo mas grandi cu lo a cuminza persigui pisca cu arma, sea cu ta trata di pisca protegi of no.

Al contrario, a bin un instruccion pa haci investigacion – pa purba kita mas especie di e lista di prohibicion, no pa drecha e lista – y convenientemente a reduci e supervision temporalmente, a sabiendas cu esaki lo a aumenta e riesgo di pesca di especie protegi. Pa colmo e maneho aki a haya apoyo di conseho di ministro, manera e propio ministro encarga cu pesca a declara na prensa ayera. Esaki ta haci cu ta surgi e pregunta urgente: nos Promer Ministro tabata na altura anto di e investigacion, incluso e prolongacion reciente di e periodo di un pausa den e supervision manera a instrui Kustwacht? Pasobra desde cu a elimina e anterior ministro encarga cu Medio Ambiente, e departamentonan cu ta e promer yamanan pa supervisa maneho di proteccion di naturalesa y pa haci eventual investigacion cientifico encuanto e lista di especie protegi, ta cay directamente bao di su autoridad y supervision. Nos mester conclui aki cu mientras e dos colega mandatarionan ta stipula maneho ‘ad hoc’ na nan antoho, lider di gobierno di Aruba no sa nada? Si esaki ta berdad anto e ta mal noticia pa henter Aruba, pasobra e ta revela un estilo di goberna cu dificilmente por confia cu nos interesnan general.

Ademas, no ta esaki ta exactamente e ‘free for all’ pa cual e ministro destitui a adverti, cu argumento, den un parlamento cu no kier a scucha y ya a pone nan mes na servicio di e mandatarionan den nan afan pa duna e interesnan limita di un grupo di piscador cu harpun prioridad riba esun di interes general, cual ta concretamente mantenimento di un flora y fauna mas tanto posible intacto, como meta ‘sostenible’?

E asunto aki ta trece ademas otro pregunta tocante con e gabinete aki ta opera. Di unda a sali cu ta duna un cuerpo uniforma orden pa no haci nan trabao via un email? Si e ministro encarga cu Pesca ta bisa cu e no a duna orden, esey ta un di e (poco) cosnan cu el a haci bon, pasobra e no ta autorisa pa haci tal. Esunnan cu por avala un maneho asina ta e mandatario encarga cu e cartera di Medio Ambiente, y esun encarga cu Husticia. Por bien ta cu nos no lo haya un reaccion publico riba e asunto aki di e ministronan menciona; esey ta keda na nan. En todo caso, manera e situacion ta actualmente, nos tin casi seis luna nos dilanti di free for all den maneho, crea a proposito, si acaso despues no prolonga e supuesto investigacion, di cual e departamento cu lo mester ehecuta esaki, ni sikiera ta na altura.

Ta tristo pa mira con ta continua cu un politica di haci nan mes ‘heroe’ di cierto gruponan special, y haciendo esaki ta dispuesto pa laga interes general tuma un asiento mas patras. Tambe mester tuma na cuenta cu tras di e asina yama ‘fabor’ na e piscador sin trabao, ta sconde e interesnan comercial di haya licencia pa facilita material pa pesca cu harpun. Como cu mayoria di hende no ta haya e decreto concerni pa lesa, e parti aki no a bira conoci. Cu un campaña electoral nos dilanti, e asunto aki ta pone ‘en tela de juicio’ e maneho ambiental di e gabinete aki. Anto nos no ta papia di e refineria ainda, con e maneho ambiental ey lo bay…?