Recientemente residentenan posiblemente a mira cu a haci algun reparacion riba algun caya di Aruba, cu tabata aparenta di ta den bon condicion caba. Aunke no ta mira ningun problema den mantene e condicion di nos cayanan, si ta lamenta ora cu esaki ta sucede mientras tin otro caya den un necesidad mas urgente cu ta keda sin haya atencion of solucion.
Franse Pas ta un di e cayanan cu semper tabata un topico di combersacion pa varios motibo. Entre e motibonan aki tin e leyendanan urbano tocante actonan satanico, fantasma, e accidentnan cu ta sucede den e area, e falta di luz y e situacion precario di e caya.
Un tempo atras, a drecha un parti di e caya aki, cual ta e parti cu ta hiba na Spaans Lagoen, sinembargo e pida cu a drecha ta caba asina cu sali for di e area chikito aki. Na momento cu cuminsa e ruta den direccion di Pos Chikito of e ruta cu ta conecta na e caretera principal rumbo Santa Cruz, e parti cu a drecha ta caba y e parti di e caya cu un calidad sumamente precario ta cuminsa.
E caya aki tin hopi tempo den e ciclo unda e buraconan ta surgi, ta opta pa simplemente yena esaki y den tempo e buraco ta bolbe sali. E caya aki ta mira como uno cu no solamente ta peligroso pero tambe dañino pa e vehiculonan cu ta haci uso di dje, specialmente riba e caya aki unda ta practicamente imposible scapa e buraconan cu forma. Den oranan di anochi esaki ta mas dificil ainda a causa di e falta di luz den cierto parti.
Manera menciona anteriormente, a tuma nota cu esaki ta aparenta di ta un ciclo unda ta yena e buraconan, esaki ta bolbe habri durante tempo y despues ta bolbe yena e buraco. E problema ta sinta cu entre e uso diario di e caya y yobida pisa, e buraco ta bolbe habri den relativamente poco tempo y ta persisti pa hopi tempo te ora cu yega na yena e buraconan back.
E usuarionan frecuente di e caya aki a expresa disgusto cu esaki anteriormente, expresando cu no ta aparenta di tin un solucion duradero den bista, cu un persona bisando: “Tur dia mi tin cu pasa via Franse Pas pa por hiba mi yiu scol, y tur dia mi tin cu tende golpinan den mi auto causa pa e buraconan y mal condicion di e caya. No ta importa con poco poco bo core, bo ta cay den e buraconan y bo ta sinti e auto ta bula pa via di e mal condicion di e caya.” Y mesun cos cu Franse Pas tin varios otro caya na Aruba cu ta den e mesun situacion o hasta situacionnan pio, sin ningun atencion presta ni tampoco un solucion den bista.
No solamente esaki ta duna un experiencia incomodo pa esnan cu haci uso di e caya, sino tambe e ta trece consecuencianan pa e vehiculonan. Un mecanico a comparti cu e buraconan aki ta forma na prome luga a causa di un combinacion di humedad, cambio di temperatura y trafico y den cierto caso, te hasta un solo encuentro cu un di e buraconan aki por causa problemanan serio na e vehiculo.
Aunke esaki ta depende di e profundidad di e buraco y tambe con lihe/frecuentemente ta pasa riba nan, e hecho ta cu esaki tin un efecto riba e vehiculo y por causa daño cu na final por ta costoso pa drecha. Por ehempel, e buraconan aki por causa bala den e tairanan, separacion den e fibra di e taira y den casonan extremo, e taira por hasta rementa. Daño na e taira y rim tambe ta algo cu por tuma luga, pa motibo cu e buraconan por troce of crack e rimnan, aumentando e posibilidad di leak y e steel wiel tambe por dobla y esaki ta haci dificil mantene presion di taira apropia.
Ademas di efectonan riba taira y rim, tambe esaki por causa problema den e suspension y alineamento. Cay den buraco por desbalansa e alineamento di e vehiculo, haciendo cu e vehiculo lo bay mas di un banda cu e otro. Aunke parti di e funcion di e shock ta di absorbe e impacto, golpinan ripiti por debilita esaki, cual ta causa cu e auto ta core na un manera mas rustico y menos smooth.
Di mesun manera cu Franse Pas tin otro cayanan cu ta haya su mes den e mesun situacion mientras otronan cu ta den condicion aparentemente si ta haya areglonan. Riba rednan social manera Facebook, a tuma nota di algun residente ta trece dilanti cu nan ta mira cu repentinamente tin caya cu capa di asfalt nobo, siendo cu e caya tabata den bon condicion caba. Di mesun manera por mira tambe na e Green Corridor tin partinan cu tin un capa di asfalt nobo, cual ta trece dilanti e pregunta, dicon den cierto cayanan cu ta den bon condicion caba si tin areglo, sinembargo e cayanan unda esaki ta berdaderamente necesario, no ta duna e mantencion adecua?
Bon Dia Aruba a acerca DOW cu algun pregunta tocante esaki. Entre otro, den bista di e situacion unda algun caya si ta ser drecha y otronan no, a puntra cua ta e criterio implementa y tuma na cuenta ora di dicidi of plania cua caya lo ser drecha. Tambe a mira cu DOW sa informa ki cayanan lo ta cera pa trabaonan cu mester ehecuta di antemano, y a puntra cua ta e cayanan den schedule pa ser drecha y si entre otro, Franse Pas, ta cay den esaki. Pa loke ta trata e drechamento di caya, nos ta compronde cu despues di cierto tempo mester bolbe drecha esaki. Cu esey den mente, a puntra cua ta e ciclo bao di cual ta opera ora ta trata di e mantencion di e cayanan aki.
Te cu ciere di edicion aki di Bon Dia Aruba, no a haya contesta na e preguntanan aki, mas ta keda pendiente pa informa comunidad den edicionnan futuro.
E topico di e cayanan ta algo cu ta keda relevante, pa motibo cu ta aparente cu tin un falta o posible desigualdad den e manera cu ta mantene of drecha e cayanan rond di e isla. Anteriormente a menciona esaki caba, pero di mesun manera cu Franse Pas tin varios otro caya na Aruba y te hasta sitionan of areanan unda tin un falta di mantenemento o atencion na e situacion cu ta desaroyando y e peligro cu esaki por trece cune. Desaroyo den infrastructura ta algo di gran importancia, sinembargo tambe ta importante pa haci esaki na un manera igual y den tur parti di e pais, pa asina evita situacionnan unda algun aspecto o area ta keda cay atras, te na un punto unda esaki por causa daño o problemanan pa nos ciudadanonan. Considerando e hecho cu nos ta paga impuesto y te hasta impuesto pa nos vehiculonan, ta di spera cu parti di e entrada aki lo ser usa por lo menos den e cayanan di cual nos ta haci un uso constante y cu esaki lo ta manteni den un condicion cu ta adecua pa su uso diario.
Ta importante pa nos keda presta atencion riba e topiconan aki y trece nan dilanti. Esaki ta un di e maneranan den cual nos por mantene nos autoridadnan concerni responsable y al tanto cu nos pueblo ta uno cu ta preocupa pa y proteha loke ta pertenec’e.
