Comunidad ta conoc’e door di e trabao cu e ta eherce como dokter. Despues di un tempo ausente, e ta presenta su mes un biaha mas como cantante cu su cancion denomina “Speransa” produci door di su persona hunto cu Maikol Lugo.

Miguel Genser ta un Arubiano cu a lanta y crece den bario di Noord. E ta defini su mes como tata, yiu y ruman, ademas e tin e profesion di dokter specialista den salud ocupacional y ta traha na Banco di Seguro Social di Aruba (SVb).

Den un entrevista special cu Bon Dia Aruba a haci cu Genser, el a bisa cu el a drenta den mundo musical ora e tabata un mucha chikito di 3 aña, na unda el a haya un xylofon como regalo y su mayornan a ripara cu e ta replica e musica cu tabata na moda na e momento ey, como Padu del Caribe.

Asina ey e xylofon a bira un piano chikito, despues un piano mas grandi. Ademas el a haya les di cuarta na scol, lesnan basico di piano na unda cu tempo el a keda desaroya y mantene su mes musicalmente activo y produciendo musica formando parti di agrupacionnan gaitero como ‘Paranda ta Nos’ y ‘Grupo di Betico’ hasta cu el a bira solista.

El a splica cu el a cuminsa skirbi musica haciendo su composicionnan propio, e ta haci areglonan musical y tambe ta haci produccion musical den studio for di basta aña caba, e prome cantica cu el a publica na aña 2001 no tabata ni cu su voz ni cu su letra pero si tabatin den dje areglonan di Genser, e cantica conoci como ‘Cuartito mio’ cu a wordo interpreta pa Edselyn Figaroa cu e grupo Paranda ta Nos ta un di nan.

“Esaki tabata den temporada di Fin di Aña, di inspiracion unda cu Edselyn a bin cu e letra y melodia, nos a acopl’e na estilo cu na e tempo ey nos kier a crea pa cu Paranda ta Nos” Genser a expresa.

Tambe, el agrega cu ademas di canto y produccion musical e ta gusta pasa tempo cu su yiunan, un di su otro pasatempo ta cushina y deporte unda e ta dedica na Taekwondo dunando les y siñando di e arte aki tambe tres biaha pa siman y como un bon Arubiano e ta gusta bay lama cu su famia.

Speransa ta un cancion cu el a skirbi ocho siman atras aproximadamente segun Genser a declara cu “ta pa sembra speransa” el a afirma cu esaki ta un carta habri cu el a traha pa su mes unda e ta bisa cu e semper ta un hende fuerte cu mente positivo, luchado y cu ta busca solucion pa problemanan, pero den e dos aña aki di pandemia Covid-19 e situacion a afecta su mes mentalmente.

“Cancion Speransa ta un carta cu ma skirbi di Miguel pa Miguel, a yega un periodo como persona, como dokter, cu mi a sinti hopi cansa, cu fatiga mental y fisico tambe, si bo no ta haci algo riba dje e pensamentonan menos positivo ta drenta, mi a reconoce di biaha e patron y sintomanan y mi a bisa no, eynan ma drenta studio y cuminsa skirbi algo”, el a comenta.

Na comienso el a duda di publica e cancion aki segun loke el a conta, pero den esey el a pensa “por ta tin mas Miguel afo cu mester tende e mensahe aki y e ora ey mi a skirbi e cancion Speransa, basicamente e ta un cancion pa tur esnan pasando den necesidad, cu tin mester di speransa cu por haya kisas por medio di e cancion algun motivacion, positivismo, claridad, pa por encontra direccion y ohala felicidad a traves di mi musica, no solamente den temporada aki pero tambe pa e aña binidero”, el a sigura.

Di loke ta trata su futuro el a bisa cu esey ta grandi, e kier sigui contribui musicalmente na Aruba den tur su formanan posibel tanto como cantante, como compositor, productor, el a expresa cu e tin varios cancion cu el a skirbi y e kier saca den aña binidero y pa proximo añanan, na su bes sigui produci musica pa diferente artistanan cu ta pendiente pa graba cune den su estudio na unda e no a duna hopi detaye pa no ‘daña e sorpresa’ manera el a comenta.

Genser ta pensa riba e manera con por sigui promove y stimula papiamento y cultura di Aruba pa asina aumenta e calidad di musica, pa e por bira un standard nobo na Aruba.

Pa finalisa Genser su mensahe pa e temporada aki ta cu a traves di su cancion e por yuda na esunnan cu mester di dje di algun manera of otro, pero e mensahe mas importante cu e kier duna ta cu “lo ultimo, no matter what kico ta pasando cu bo, independientemente di con grave e situacion por mustra di ta, lo ultimo ta pa no perde speransa, sigui traha y sigui pusha bay dilanti, aprecia tur lo cual bo tin, mi ta desea pueblo di Aruba henter un temporada di Fin di Aña cu hopi salud, hopi paz, felicidad, productividad cu hopi alegria y cu 2022 lo un aña cu nos por colecta, cosecha tur e felicidad ey y positivismo, claridad y motivacion pa cada un di nos”.

 

 

talento Argentino Paul “Alfie” Garcia

LEAVE A REPLY

Please enter your comment!
Please enter your name here