Dianan ta pasa, y e problema di screening di candidato pa minister di AVP, parlamentario Mike de Meza, ta keda sin resolucion. Entre tanto, abogado di De Meza, Desiree Croes, a bisa prensa local cu ayera diabierna lo entrega un demanda contra DIMP pa laga Corte resolve e impasse.
NoticiaCla a informa cu a haya confirmacion diahuebs ultimo cu ayera mainta, abogado Croes a entrega e apelacion y voorlopige voorziening den nomber di su cliente. “Ta laga e decision den man di hues,” e abogado a indica.
E abogado a bisa cu “a pesar di splica directora di DIMP na placa chikito cu cliente Mike de Meza tin derecho di haya un verklaring omtrent het fiscale gedrag, mirando cu no tin ningun debe di impuesto, no a logra convence di esaki,” e abogado a bisa NoticiaCla. Pa e motibo aki, a dicidi di bay corte pa haya claridad.
Ainda no tin un fecha poni pa trata e caso. Loke ta conoci ta cu De Meza no a pasa e screening pa bira minister den Gabinete AVP-Futuro relaciona cu su comportamento fiscal, e parti di e screening cu ta cay bao DIMP.
E desaroyo aki ta bira interesante, pa motibo cu si hues interveni den e proceso di screening, e ora e lo habri caminda pa intervencionnan similar den otro casonan di screening, cu por perhudica cierto persona. Un precedente legal asina por trece diferente consecuencia, pues mester keda pendiente na e decision di hues den e caso aki.
Durante proceso di formacion, formadornan Mike Eman (AVP) y Gerlien Croes (Futuro) a dirigi e proceso di screening di tur candidato. Manera a reporta e tempo aya, e proceso ta largo y hopi profundo, y ta tuma su tempo. Entre tanto, tur candidato pa minister di ambos partido a pasa e screening y a asumi nan posicion como minister – cu excepcion di Mike de Meza.
De Meza mes a confirma anteriormente cu e problema pakico e no a pasa e screening ta sinta na Departamento di Impuesto.
