(AP) — Miles di hende diamars a atende e entiero organisa pa e grupo militante Hezbollah pa su hefe militar mas halto, un dia despues cu el a muri den un atake aereo Israeli riba un bario den suburbio meridional di Beirut.
Simpatisadornan di Hezbollah a pasa banda di e caha di morto di Haytham Tabtabai, cubri cu e banderanan geel di e grupo, ora el a ser carga den medio di e multitud. E entiero di Tabtabai y dos otro miembro di Hezbollah a tuma luga den un santana na sur di Beirut, unda soldadnan di e grupo tradicionalmente ta ser dera pa sosega.
Israel diamars a ataca capital di Libanon pa prome biaha desde juni, bisando cu el a mata Tabtabai. E militar Israeli a describie como hefe di personal di Hezbollah. Israel tambe a adverti e grupo sosteni pa Iran pa no rearma ni reconstrui un aña despues cu nan ultimo guera a caba cu un alto-al-fuego media pa Union Europeo (EU).
E atake di diamars a mata 5 persona y a herida 28 otro, segun Ministerio di Salud di Libanon.
“Laga Israelinan sigui cu nan atakenan riba nos. Nan kier nos rindi pa nan por drenta nos cas? Bo a mira loke a pasa na Gaza? Loke nan a haci? Nan no a haci nada,” segun un simpatisante di Hezbollah cu a identifica su mes como Jaafar.
Un otro simpatisante di Hezbollah, Fatima Shehadeh, a bisa cu “no importa cuanto sanger ta cay, nos nunca lo rindi, y nos nunca lo entrega arma di resistencia.”
Ministerio di Asuntonan Exterior di Francia diamars a expresa “preocupacion profundo” tocante e atake y un posibel escalacion, pidiendo e partidonan pa usa e mecanismo di monitoria di alto-al-fuego pa reporta menasanan y pa no tuma “accion unilateral.”
Atakenan aereo Israeli den sur di Libanon a intensifica den e ultimo simannan, mientras cu Israel y e Merca ta pone presion riba Libanon pa desarma Hezbollah.
Israel ta afirma cu e grupo ta purba reconstrui su forsa militar. Gobierno Libanes, cu ta apoyando desarmamento di Hezbollah, a nenga nan. E tambe ta bisa cu tropanan a ser desplega na e region sur, pero cu su ehercito cu falta recurso mester mas medio.
Den december, Hezbollah a tira varios raket cu a cay den tereno habri cerca di un base militar Israeli y a yama esaki un “advertencia.” Tabata e unico biaha cu el a tira despues cu un alto-al-fuego a caba e guera Israel-Hezbollah november aña pasa.
