Schwengle caso Koolman JO (1).JPG

Minister di Salud Alex Schwengle a tene un rueda di prensa diamars mainta riba e caso di famia Koolman y ta bisa cu conhuntamente cu e famia, e kier bay lanta un keho contra e hospital Engativa cu a trata famia Koolman den un manera hopi inhumano.

“Nunca di mi bida mi ta tende di un hospital cu ta trata hende den e manera aki.” Minister Schwengle kier entrega un keho na gobierno di Colombia pa investiga e manera cu nan a trata ‘nos Arubianonan’ eynan. E kier invita e famia Koolman tambe pa dialoga riba e trato cu nan a ricibi na e hospital aki cual tin di haber entre otro con nan a para duro riba e placa y confisca e curpa.

 

Aruba tin bon relacion cu Colombia y segun e mandatario hasta nan ta aprecia cu algo no a bay bon. Esaki lo ta algo bon pa e famia cera e buki mas trankil pasobra nan ta hopi defrauda den manera cu hospital a trata nan tambe, segun e. Na Aruba, si un turista bira malo anto pa su mala suerte e fayece den hospital, nan no ta keda cu e curpa. “Nos ta zorg pa tin un reglamento di pago y no uza e curpa pa manipula pa haya placa of menasa cu tanten mi no haya e placa mi ta keda cu e curpa. Esaki ta cosnan moralmente cu nos no ta haci na Aruba.”
 

Con a yega na e hospital aki?

Segun yiu muhe di Minguel Koolman, esta Maritza Koolman ta splica Bon Dia Aruba, tur cos a pasa asina lihe y nan mes no a haya tempo pa busca un hospital prome cu e yega Colombia. Manera cu nan a yega Colombia, e ambulance a bisa nan cu e tata tabata den un estado cu e mester a bay hospital de inmediato anto e famia a djis sigui nan y nan a bay na e hospital di mas cerca.

 

Ta humano pa keda busca speransa

Segun minister, e no ta kere cu e discusion mester ta si e famia a haci algo fout of no. “Bo mester hinca bo mes den sapato di e persona cu ta desespera pa biba. Aunke cu el a haya diferente opinion caba, bon opinion di e miho expertonan di Hulanda, cu lastimamente ta bisa nos cu e diagnostico y terapia cu a wordo duna ta bon, pero cu no tin mucho of nada mas pa ofrece,” minister Schwengle ta bisa.

 

Ta humano pa un persona keda busca speransa. Pero segun e mandatario, lo mas importante ta cu si a caso bo kier tuma e riesgo cu bo por pega manera cu e caso aki a bay, sea bon prepara y tene cuenta cu e consecuencianan cu por tin. Den otro palabra, wak pa bo tin un bon seguro y tambe placa pa defende bo mes. E mes no a haci ultimo testnan riba sr. Koolman, minister Schwengle ta bisa, anto si e dokter concerni a kere cu sr. Koolman tabata apto pa bula, ta na e dokter mes pa determina esey.

 

Minister Schwengle ta comenta cu e tabata perfectamente na altura di e caso for di hopi tempo caba mirando cu Sr. Koolman tabata su pashent den pasado. Na momento cu sr. Schwengle a tuma e posicion di minister, e cuido di pashent Koolman a bay na su colega. “Su yiu di criansa ta traha cu mi tambe pues mi tabata tur dia al tanto di e caso. Ta bon pa conta esaki pasobra un miembro di famia a dicidi pa motibo di su dolor y emocion kisas pa conta su banda di medaya anto cierto parti absolutamente no ta berdad.”

 

Minister Schwengle ta bisa cu e ta duel e hopi den loke e famia a pasa aden mirando cu esaki no tabata un trayectorio bunita pa e famia. E ta comenta cu e tabata na altura cu pashent Koolman lo ta bayendo den exterior anto el a bisa cu esaki tabata algo cu lo tin hopi riesgo y a bisa na prome instante cu como minister, e no por a haci nada. “E unico poder cu mi tin ta pa yuda via AZV y ley di AZV ta prohibi mi pa haci uzo di e ley pa casonan asina. Si mi firma na e momento ey, mi mes lo mester paga tur cos y ohala mi tabata tin e placa ey.”

 

Proceso a dura hopi, no tin protocol

Minister Schwengle ta admiti cu e proceso a dura hopi en cuanto ta yuda e famia Koolman y e les cu nan a siña ta cu no tin un draaiboek pa e casonan aki. “Mi a palabra esaki hunto cu minister president como tambe colega Paul Croes, pa nos traha un protocol. Pa sigura cu den futuro na momento cu un ciudadano haya su mes den un situacion asina ki, sea ta su mesun culpa of no, pa nos zorg pa tin un protocol na momento cu nan bati na nos porta pa esaki cana un tiki mas lihe.”