“A hinca e investigacion relaciona cu acusacionnan absurdo den man di husticia local y internacional”, asina Minister mr. Andin Bikker a anuncia e siman aki. E ta referi na un persona cu Guarda nos Costa a deporta algun tempo atras y cu a lansa varios acusacion awo riba Facebook for di Republica Dominicana. 

Cu e pandemia aki atacando henter mundo, e uso di rednan social a bira mas grandi. Como cu hende ta mas pendiente pa desaroyonan rond di medidanan di salud y orden publico, a causa cu ta mas riba nan computer of celular. Y como tal, mas lihe ta publica opinion y videonan riba plataformanan manera Facebook. Esaki sin duda a haci cu autoridadnan awendia tin nan man yen di investigacion y casonan penal persiguiendo tur esunnan cu ta viola derechonan di otro, door di comete crimen cibernetico.

Na Merca a nota un escalacion den provocacion y instigacion cu tabatin consecuencia cu a hasta suspende e cuenta di un ex-mandatario. Mester ta cla pa tur hende cu no por malusa e plataformanan aki pa provoca violencia of plama mentira.

Algun siman atras por a observa un persona estableci na Hulanda cu a yama pa violencia y bay cende candela.

Di otro banda, Minister di Husticia, Seguridad y Integracion, mr. Andin Bikker a hay’e confronta c’un persona deporta pa Santo Domingo cu diripiente a lansa yen acusacion absurdo contra su persona y esey ta hopi di lamenta, segun un comunicado di prensa.

Na Aruba a institui na 2018 un seccion cibernetico den husticia, NCTVI, cu ta traha di cerca cu Interpol, un division internacional di husticia local.

“Mi a entrega un keho penal y e cadena hudicial local y internacional lo sigui atende cu e keho. No mester pensa mes cu como cu ta estableci den exterior cu husticia no ta conta pa nan. Siguramente tin hurisprudencia di Corte Supremo cu ta duna hurisdiccion na Corte tanto di Aruba y den Reino Hulandes ora tipo di casonan asina tuma luga.

“Ta di lamenta cu nan ta purba daña nomber di hende, den e caso aki ta purba atacha e nomber di mi persona,” asina Minister Andin Bikker a duna di conoce durante un conferencia di prensa. E acusacionnan ta falso, sin pia ni cabes y ta wordo refuta.