Durante su bishita na Sint Maarten en conexion cu e reunionnan di Justitieel Vierlanden Overleg (JVO), Minister di Husticia di Aruba, mr. drs. Arthur Dowers (AVP) a asisti na e evento di groundbreaking na Pointe Blanche Prison, marcando e importancia den e esfuersonan mas amplio di Aruba pa modernisa e facilidad coreccional KIA.
E bishita ta den cuadro di e plannan di Aruba pa construi un prison nobo pa reemplasa e prison KIA cu ta alarmantemente deteriora y ta conta cu capacidad limita pa hopi tempo caba.
Hunto cu S.E Gobernador di Sint Maarten, Ajamu Baly, Minister di Husticia di Hulanda, Foort van Oosten, Minister di Transporte di Corsou, Charles Cooper y demas mandatario- y invitadonan, a ricibi un presentacion amplio di Minister di Husticia di Sint Maarten, Nathalie Tackling y Director di prison di Pointe Blanche, Steven Carti.
E proyecto ta enfoca riba e problemanan di capacidad y infrastructura cu e facilidad actual ta enfrenta, cual tin capacidad pa acomoda 80 hende homber y seis hende muher, mas 15 cel di polis cu por uza solamente pa un maximo di dies dia segun ley. E proyecto di Pointe Blanche nobo ta inclui un cantidad amplio di mehoracion esencial y infrastructural. Esaki ta inclui un seccion di detencion preventivo, seccionnan mas amplio pa detenidonan masculino y femenino, facilidadnan pa educacion y capacitacion profesional, cambernan di consulta medico y dental, consultorio pa apoyo psicologico, espacionan recreativo y facilidadnan moderno pa e personal. Tambe lo inclui sistemanan di siguridad ultra-moderno pa mehora e maneho di preso y siguridad di e personal.
Bao di e plan di desaroyo, e capacidad di e prison lo casi duplica. Ta proyecta cu fase un lo termina den e prome kwartaal di 2027, cual lo aumenta e capacidad di 80 pa 120 cel. Fase dos ta proyecta pa keda completa na 2028, y lo expande e total cantidad di cel na196. E cifra aki ta basa riba proyeccionnan di criminalidad, referencia regional y loke e pais por permiti economicamente.
E presencia di Minister Dowers na e evento di groundbreaking a subraya e importancia di cooperacion regional y intercambio di conocemento, mientras Aruba ta sigui cu su plan pa construi un facilidad coreccional moderno cu ta cumpli cu standard internacional manera e Nelson Mandela norm adopta pa Nacionnan Uni na 2015.
E facilidad coreccional nobo di Sint Maarten lo conta cu sosten, di United Nations Office for Project Services (UNOPS) cu den e siguiente dianan tambe lo ta na Aruba pa duna un presentacion pa un prison nobo pa Aruba.
