Recientemente, Bon Dia Aruba a tene un entrevista cu Minister di Husticia, Integracion y Transporte Publico Arthur Dowers durante e entrevista e mandatario a elabora riba e topico di KIA y e situacion actual di e institucion.

No ta un secreto cu e situacion di e instituto ta uno hopi critico. Pa loke ta trata inversion pa e institucion, minister Dowers a splica cu den Landspakket, di loke e por mira, no tin placa specifico pa inversion den KIA, pero loke si tabatin ta placa cu Hulanda a pone disponibel pa algun consultant internacional bin pa haci evaluacion y investigacion di e instituto.

Esaki, el a remarca, lo ta sucediendo “pa di tantisimo biaha” y nan lo haci locual ya caba a ser realisa mas di un biaha. Na mesun momento el a subraya cu loke nan ta bay haci aworaki, e evaluacion y investigacion, no ta algo bon.

E mandatario a indica a expresa cu ta lamentabel pa constata cu cada biaha, papiando di e ultimo 15 aña, cu un minister nobo ta bin ta haci investigacion y documenta e resultadonan pero despues di esey nada no ta pasa. El a agrega cu esaki mas cu claro ta frustrante pa e trahadonan cu tin hopi tempo trahando den condicionnan cu no ta adecua.

Minister Dowers a splica cu ora AVP a bandona gobierno anteriormente tabatin un estudio basta extenso di e situacion di prizon caminda a determina cu mester bin un prizon nobo y ora nan a bay a bin un otro minister di husticia y e minister nobo a hasta pone un localidad y a usa e plannan cu AVP a laga tras tambe pa yega na un diseño pa un prizon nobo.

El a indica cu tabatin hasta un contratista cu a acerca su persona pa bis’e cu e la gana e proyecto y cu e tabatin e oportunidad pa construi e prizon. “Mi a mira e mapanan pero mi no a mira ningun obligacion di parti di gobierno pa dun’e e proyecto pasobra e proyecto no a ser duna,” el a agrega.

El a sigui splica cu despues di cuater aña a bin un otro minister y na final di su periodo tin un investigacion andando atrobe pa haci loke a ser haci den e ultimo 10 pa 15 aña caba.

E mandatario a remarca cu aworaki si despues cu e estudio aki termina mester yega na un conclusion cu yega na un prizon nobo pasobra loke tin aworaki ta bay cay den otro.

Noi ta un secreto cu e infrastructura di e edificio ta den un estado deplorabel. Referiendo na un imagen cu a circula recientemente di un muraya na KIA den mal condicion el a splica cu esey no ta algo di awor y cu e muraya na un punto cu cualkier dia e por cay den otro.

El a sigui splica cu den e mesun periodo cu e muraya aki ta asina malo, gobierno anterior a traha un waya rond di e muraya aki cu ta den cay den otro, cual el a indica no tin sentido pasobra den un par di dia e waya por kibra y hende tambe por corta e waya facil si nan kier drenta. El a agrega cu ademas awendia no mester ni bay cerca di e prizon pa tira cos den prizon pasobra tin drones ta laga cosnan cay den e tereno di prizon.

E a mandatario a señala cu pone un waya over di e tereno di prizon tin mas sentido pasobra ora cu hendenan kier tira cos cu drone e ta evita cu cosnan ta cay den e tereno di prizon, y ya e ora ey e no ta gasta casi un miyon of mas pa pone waya rond di un prizon cu hende por djis kibra.

Minister Dowers a subraya cu e retonan cu a keda ta hopi grandi den prizon, y e trahadonan ta traha bou di condicionnan hopi dificil.

El a splica cu recientemente el a combersa cu sindicato cu ta representa trahadonan di KIA y nan a informa cu nan ta hopi desilusiona pa loke a sucede den prizon den ultimo añanan. “Aworaki tin un obligacion pa duna speransa back na e hendenan cu algo lo pasa den prizon e temponan nos dilanti y cu nan ta bay haya un condicion di trabou miho,” el a enfatisa.

E mandatario a indica cu e perspectiva ta pa yega na un facilidad adecua pa por traha y e construccion di un facilidad adecuado ta haci tambe posible cu por usa e personal hopi mas eficiente y por haci uso di tecnologia mas avansa pa garantisa tambe cu e costonan pa maneho di un prizon por ta poco menos di loke nan ta aworaki.

No obstante el a subraya cu tin cu haci cierto intervencion aworaki den prizon pa loke ta trata e condicionnan di trabou di r hendenan, pero tambe di e infrastructura. El a splica cu por ehempel tin cierto murayanan den e prizon mes cu ta den estado hopi critico cu den cierto momento nan por cay den otro, pilar cu ta tene e dak cu ta putri, WCnan kibra, sushedad, entre otro.

“E luga ta gewoon un desaster y mester haci algun intervencion, manera haci e luga limpi y percura pa e luga ta un tiki miho di loke e ta na e momentonan aki. Esey ta placa cu lo mester inverti aworaki pa garantisa e condicionnan di trabou di e trahadonan y percura pa nan seguridad tambe. Eynan mester bay placa y mester traha riba e proceso tambe di e estudio cu nan ta haci aworaki cual tin como meta principal pa yega na un prizon nobo,” el a enfatisa.

Inversion

Bon Dia Aruba a tuma contacto tambe cu actual parlamentario di fraccion MEP y ex-minister di Husticia, Rocco Tjon pa puntra tocante inversion cu a ser realisa den 2024 y kico tabata e criteria cu a yuda scoge den cual area ta haci inversion.

El a splica den su contesta cu pa loke ta infrastructura nan a inverti den mantencion, pa asina e deterioro ta menos, mientras ta traha riba e plannan pa yega na un instituto nobo. El a indica cu nan inverti den e parti infrastructural si na CDM ( e parti net pafor di KIA), den e mediache dienst (completamente renoba) y tambe e jeugdafdeling, pa por a cuminsa cu e proyecto di jeugd.

Banda di esey, el a sigui splica, cu nan a inverti hopi den educacion, tayer y tayernan pa e presonan tambe y a laga pa 2025 un plan di educacion ful aproba y recursonan tambe pa esaki.

A puntra e parlamentario tambe tocante e plannan pa un instituto nobo. El a splica cu gobierno anterior a laga acuerdo firma cu Hulanda y UNOPS pa diseña e instituto nobo y e fondonan pa cu esaki a ser traspasa tambe door di Hulanda. El a indica cu e diseño di esaki lo mester keda cla r aña aki.

El a agrega cu e siguiente stap ta e ora pa aloca recurso, negocia cu Hulanda, pa por inicia cu ehecucion di e proyecto pa un instituto nobo