Diabierna atardi a tuma luga un conferencia pa asina duna Aruba un pabien cu e ‘Tier 1’ den ranking di traficacion humano.
Segun minister Andin Bikker (POR) e tabata un dia memorabel paso e esfuerso di hopi aña di parti di Aruba pa locual ta trata traficacion humano pa combati y evita esaki sigui sosode. Ta wordo reconoci cu tin 10 aña cu e proceso ta andando.
E mandatario ta splica cu un suma placentero el a tuma nota cu e rapport cu a wordo publica. “Aruba a logra e Tier 1, e rating cu ta wordo duna ora un pais ta haci un esfuerso y ta progreso den combati traficacion humano. Aruba a yega e maximo y miho ranking y esaki ta un orguyo y un reconocemento hopi bon, pero ta trece tambe responsabilidad cu ne tambe.”
“Di parti gobierno di Aruba nos ta haci e compromiso pa sigui tene reconocemento aki debidamente y cu nos lo bay ehecuta manera ta prescribi pa nos mantene e ranking aki”, e mandatario ta sigui splica.
Segun e minister e gobierno di Aruba y e mes como minister di Husticia, Siguridad y Integracion a compromete cu e plan di accion wordo eherce. “A pesar di e plan di accion tambe tin un plan di vision lo cual ta dirigi na e combatimento y persecucion di traficadonan.”
E mandatario ta menciona cu tin un unidad special pa traficadonan di persona cu ta den operacion. Den cooperacion cu Aruba Police Force, y coordinador di traficacion di humano, esta Jeannette Baars-Richardson ta haciendo e miho esfuerso pa persigui y captura e traficadonan.
“Sra. Baars-Richardson ta esun cu ta haci e esfuerso aki di basta tempo. Riba dia 1 januari 2018, a ser firma un protocol pa combati traficacion di humano. E plan di accion ta consisti di por persigui, identifica y captura traficadonan y pa provee yudansa y guia na e victimanan. E unidad ta hayando mas material y personal pa asina brinda mas ayudo y suporte na e victimanan cu ta pasa den traficacion. E gobierno di Aruba lo tuma accion, y cualkier cos cu mester wordo haci pa evita casonan asina.”
Sra. Baars-Richardson ta haci 10 aña como coordinador pa combati e traficacion di humano. E ta splica cu na 2006 human trafficking tabata ‘un otro tipo di crimen’, y di e momento ey, pa tur e añanan nos a pleita pa por logra e ranking Tier 1 y ‘finalmente’ nos a logra.
Puntonan di mehoracion
E ta aclara cierto punto cu por mehora den añanan cu ta bin. “Nos no tin un budget separa manera tur otro budget nan di gobierno pa nos por haci nos trabou, pero nos ta bezig cu gobierno pa otro aña por logra esaki”, segun sra. Baars-Richardson.
“Mester sigui cu investigacion cu casonan di traficacion, pa ora haya e traficado, por pone suficiente castigo unda cu e traficado no haci esey mas. Por inverti mas den posibilidadnan di e victima di traficacion. Nos kier train hopi mas hende pa e trabounan aki y tambe pa pone mas atencion na e grupo di risico, cual ta e ser femenino den caso di prostitucion. Tambe pa esunnan cu ta traha na cas, supermarket of otro labor, nos kier pone mas atencion. Otro atencion ta pa nos sigui duna inmigrantenan nan derecho ora nan ta haya nan mes den problema pa unda nan por bay y shelter nan pa tur victimanan di criminalidad.”
Sr. Olsen (consulado di Merca) estableci na Corsou ta bisa cu ‘e ta contento’ di por representa e gobierno di Merca y consulado di Merca na Corsou y nan mision pa henter Caribe Hulandes. Segun sr. Olsen pa ta den ranking ‘Tier 1’ ta un bon esfuerso.
E ta splica cu traficacion di humano ta un negoshi multi biyonario. 24.9 miyon di persona riba mundo henter ta trahando den sclavitud y trabou forsa. E ta duna ‘pabien’ na Aruba pa e logro. “Aruba ta un isla chikito y e esfuerso cu ta wordo haci ta algo pa ta orguyoso.”
E ta sigui splica cu e sa cu ‘e industria ilegal no ta algo cu ta bay disparce pronto’. “Mas nos pone siguridad pa evita traficacion, mas e traficadonan ta bira experto y mas creativo pa nan por haci nan negoshi ilegal.”
