Minister Bermudez ta kibra silencio riba nombracion gobernador

Minister Angel Bermudez a kibra su silencio cu Bon Dia Aruba tocante su candidatura pa bira Gobernador di Aruba.

E ta haya cu e echo cu el a wordo considera candidato pa bira Gobernador, e tabata un honor pe pa asumi un funciona asina importante. P’esey e ta lamenta profundamente cu e funcion aki, caminda basicamente Gobernador tin dos rol: Di un banda como hefe di gobierno di Aruba y di otro banda e ta representa e Rey Hulandes riba nos isla, a bira “suheto di un wega politico”. E no ta kere cu esey lo añadi of lo contribui pa un miho funcionamento di dje den futuro.

“Mi ta haya cu e ta wordo mancha, y mi ta lamenta esey.”  E ta spera cu esunnan cu ta responsabel di esaki pa nan sa di asumi nan responsabilidad y ehecuta e funcion debidamente.

E proceso di candidatura tin su secresia te ora cu e proceso aki culmina, locual a sosode recientemente na momento cu e decision final a cay for di Hulanda cu ex minister Plenipotenciario, Alfonso Boekhoudt ta bira nos proximo Gobernador.

‘Capitulo cera’
Despues di e impasse cu a surgi di parti di Gobierno di Aruba riba e forma con e proceso aki a tuma luga e nomber di minister Bermudez a sali den luz publico como e candidato potencial di Gabinete Mike Eman II pa asumi e funcion aki. Minister Bermudez ta kere cu esaki ta “un capitulo cera.” Sinembargo el a laga sa cu tur hende ta na altura cu e procedura aki a wordo hiba y finalisa door di Hulanda, na un manera cu a desvia for di protocol cu tin specialmente skirbi na 2001.

Lista di candidato
E mandatario a relata na Bon Dia Aruba cu na inicio di aña su persona a wordo acerca door di Minister President cu e pregunta si e ta dispuesto pa e funcion aki. “Ma bis’e cu mi ta dispuesto, pero no na e momento cu basicamente e periodo di Gobernador Refunjol ta yega su fin cu tabata mei.”

E mandatario a bisa cu debi cu na e momento ey e mester finalisa e presupuesto 2017 y tambe e cuenta anual di 2015, inmediatamente e no por asumi e funcion ey. “Mi a bisa cu si tin otro hende na e momento ey, nan por haci esey. Pero si di otro banda nan ta dispuesto pa warda mi caba e trabou ey, mi por ta un candidato.”

Ta asina cu a base di esey, Minister President a traha un lista cu tres candidato, segun sr. Bermudez: ex Minister Dr. Ike Posner y ex Parlamentario Sra. Margaretha y Minister Angel Bermudez. E lista aki a wordo entrega na Parlamento como e proposicion di parti di Gobierno pa asumi e posicion cu Gobernador Refunjol ta bay laga atras.

Entrevista na Hulanda
E ta sigui relata cu na fin di april y inicio di mei ultimo cu e tabata na Hulanda, el a wordo entrevista door di su colega di Reino Hulandes, minister Plasterk  pa e funcion  aki. E tabata un entrevista di mas cu un ora, caminda el a duna su punto di bista riba e funcion y con e por ehecuta e funcion aki.

Na augustus Richard van Zwol kende ta Secretario General di Minister Plasterk, tabata na Aruba unda el a sostene un combersacion cu Minister Bermudez. Den e reunion aki no solamente nan a papia riba financia publico sino riba e funcion di Gobernador.

“For di eynan pa mi a drenta un silencio, mi no a tende nada mas te cu un par di siman pasa ora cu di repenti a sali afo cu Hulanda a hiba e procedura na su antoho.”

Sopresa
Pa minister Bermudez a indica cu e decision pa eligi e Gobernador nobo tabata un sorpresa pe. Y despues basicamente e no tabata mucho interesa, pasobra e no ta kere cu mester hunga wega cu e procedura aki. Ademas e tabata hopi ocupa cu e situacion delicado di salud di su tata, kende a fayece recientemente.

E tin cu bisa cu den e ultimo simannan e no tabata  parti mas  di e deliberacionnan  cu a tuma luga, ni ora cu Minister Plenipotenciario tabata aki na Aruba, caminda a wordo hiba un deliberacion cu ne. Despues tampoco, te dialuna siman pasa ora minister Bermudez a cuminsa traha atrobe.

Pero si el a tuma nota di e resultado di e procedura manera a wordo hiba na Hulanda, y e ta considera esaki “un capitulo cera.” E ta sigui cu su trabou como minister, ya cu e ta haya cu tin hopi cos pendiente prome cu fin di aña, ya cu 21 di december Parlamento ta bay cu receso. Entre e asuntonan pendiente e mandatario a menciona e presupuesto 2017, presupuesto supletorio 2016, cuenta anual 2015; y ademas e rapport di e di tres kwartaal di 2016 pa e colegio di supervision CAft pa dia 15 di november proximo. “Pa lo demas pa mi no tin tempo pa pensa riba otro cosnan.”