Dialuna den oranan di merdia, Minister di Husticia, Andin Bikker a tene un reunion pa atende cierto malestar den Warda Nos Costa, unda ta pidi pa retira e hefe di e cuerpo aki, Trudy Hassell.

E mandatario kier a sinta na mesa cu ambos partido y wak kico tin riba mesa. Sinembargo, e no ta kere cu cada pasa un par di siman, mester bin cu cartanan cu ta pidi pa un hefe di departamento tuma retiro. “Pasobra con bo ta bay goberna e pais aki!”, el a expresa.

Bikker a destaca e rol crucial cu Warda Nos Costa ta ehecuta den cuadro di e retonan cu e pais bisiña Venezuela ta pasando aden. Esaki den e lucha contra migracion ilegal den nos isla. E ta haya cu e personal aki ta trahando cu hopi stress.

P’esey e kier a sinta na mesa pa busca un solucion na cualkier impasse. “Na mesa, den tur trankilidad, nos ta wak con nos ta soluciona e problemanan aki.” E ta di opinion cu na mesa nan por sinta un rato pa wak kico ta e diferencia di opinion di un manera constructivo.

Prome el a reuni cu e directornan di Warda Nos Costa, y despues pa 3or di atardi, e tabatin un reunion cu e sindicato. E mandatario a sigura cu gran mayoria di e personal di Warda Nos Costa ta contento cu e maneho cu e hefe di e departamento aki, Comisario Trudy Hassell ta hibando den e cuerpo uniforma aki.

Bikker a declara cu for di cu el asumi e cartera aki, cada biaha tin mini referendum cu diferente pensamento. Un par di siman pasa, el a haya e resultado di un mini referendum cu a tuma luga den Warda Nos Costa. Segun e mandatario, un gran cantidad di persona den e cuerpo uniforma aki a indica cu nan ta contento cu e trabou di Hassell. El a declara na prensa cu e ta compronde cu tin un minoria tambe cu tin otro opinion riba hefe di Warda Nos Costa su trabou. Igualmente nan kier pa e departamento aki por haya su independencia.

E mandatario a yega di duna un resumen riba, entre otro, e logronan pa cu e departamento aki. Igualmente, el a laga sa cu nan lo presenta un ‘project dossier’ pa aplica riba e fondo cu Hulanda a pone disponibel pa reenforsa nos fronteranan.

E ‘project dossier’ ta relaciona cu un proyecto di expansion grandi di edificio actual di Warda Nos Costa, cu un inversion calcula na 2 miyon florin. Minister ta haya importante e proyecto aki, ya cu e capacidad di detencion di personanan, mayoria di e pais bisiña di Venezuela, cu a purba di drenta of keda na Aruba ilegalmente, a keda limita. Tambe nan kier bin cu un sistema di monitor electronico den cuadro di Ley di Admision y Expulsion, LTU.

 

 

LEAVE A REPLY

Please enter your comment!
Please enter your name here