Aruba como centro di distribucion pa companianan grandi manera Alibaba y Amazon. Esey ta e plan cu Minister di Transporte y Sector Primario Chris Romero a bisa cu ta bay brinda hopi perspectiva pa San Nicolas. Minister Romero a anuncia esaki durante un reunion informativo di Parlamento riba futuro di San Nicolas. E reunion tabata yama riba peticion di Parlamentario Alan Howell di POR.

Aruba ta brinda tur posibilidad pa ta un centro di distribucion despues cu Aruba a logra gana e posibilidad pa bira un hub pa e Universal Postal Union, un agencia specialisa di Nacionnan Uni y e forum principal di cooperacion internacional.

Durante e reunion ayera, Romero a bisa cu na 2019, Aruba a logra gana e posibilidad pa bira e e-commerce hub UPU. Tabatin un competencia grandi den Caribe pa logra bira e hub, cu segun e Minister, lo permiti Aruba practicamente bira un almacen (warehouse) pa productonan di e mega companianan cu despues lo por bay pa paisnan den region. “Alibaba, Amazon lo por trece nan producto na Aruba y ora cu otro pais ordo esakinan, nan lo por sali di Aruba pa otro pais.”

Romero a bisa cu Aruba a gana e posibilidad aki danki na e conectividad aereo y maritimo, cu ta un di e mas grandinan den Caribe. Tres pais den Caribe a haya e posibilidad aki. Banda di Aruba, Puerto Rico ta bay ta un hub, y e Minister no tabata sigur si e di tres ta Bahamas of Barbados. “Importante ta cu nos tin e hub.”

COVID-19

E motibo pakico no por a desaroya e organisacion ainda ta pasobra di e pandemia di COVID-19. UPU lo a manda un experto for di Africa pa yuda organisa henter e infrastructura, “E ta un trabao grandi, pasobra mester di cooperacion di Post Aruba, Inmigracion y tambe Duana.”

A pesar cu no a lant’e for di pia ainda, Aruba a keda cu e proyecto, segun e Minister, a pesar cu hopi otro pais kier ‘e. “E hub aki lo trece hopi mas movecion. E lo beneficia Aruba completo.” (red. Bon Dia Aruba a bay riba e website di UPU, y a haci un investigacion chikito pa haya mas detaye di e plannan pa crea hub special na Aruba. Pero no a logra haya informacion, ainda).

Ley San Nicolas Port Authority and Industrial Development

Un di e hermentnan pa logra e proyecto aki y mas, ta e proyecto di ley, San Nicolas Port Authority and Industrial Development. E concepto di ley a keda concipia pa huristanan di e Ministerio di Transporte y Sector Primario hunto cu huristanan di Direccion Legislacion y Asuntonan Huridico, DWJZ.

“Gobierno ta un continuacion,” Romero a bisa. “Pero mester a wak kico mester a mehora y esey a tuma tempo. A tuma encargo di Gobernacion na 2017 y a analisa e problemanan cu mester mas atencion.” Pero a mira e posibilidadnan di San Nicolas, cu ta beneficia henter Aruba, mester a haci estudio riba proyectonan duradero. “Pues na 2018 a haci e analisis y diferente estudio. Asina a determina e proyectonan cu ta beneficia San Nicolas.”

Pero pa logra proyectonan, nan mester tin nan base legal y esaki ta e concepto di ley cu ta practicamente cla y aki un par di siman lo bay Raad van Advies.

“E ta un proceso cu ta tuma su tempo. Tin diferente compania envolvi. Na 2019 a entrega e plan na Gobierno.” Y di eynan a bin e proyecto di ley. Pero e Minister a bisa cu COVID-19 a stroba e progreso, mirando cu tabata casi cla pa ehecucion di e ley.

Terenonan di refineria

Minister Romero a splica cu e siman aki lo sinta cu Refineria di Aruba pa mira e impacto di e ley, cu ta encera cu ta bay uza terenonan cu pa hopi aña tabata para keto. Ta trata di terenonan cu tabata pertenece na e refineria. “Aruba como pais lo por uza e terenonan aki di forma positivo,” Romero a sigui bisa, agregando si cu berdad ta cu for di 2019 hopi di e terenonan aki ya ta den man di Aruba, pero desaroyonan a sigui y algun tereno a bay pa otro destinacion. E Minister ta enfatisa cu e ley lo permiti estimulo di economia y bisindario, promocion di e waf, innovacion den agricultura y energia. “Aruba lo bira un hub pa container. Companianan ta considerando pa Aruba bira un hub, unda baha container na Aruba pa otro barco pasa busca nan y hiba nan pa nan destinacion. “E ta un proyecto cu por trece hopi placa pa Aruba.”