Durante un conferencia di prensa recien di Gabinete AVP-FUTURO, Minister di Labor, mr. Wendrick Cicilia a suminstra informacion pa cu e maneho y vision p’e sector laboral. Entre otro, e mandatario a indica cu cooperacion cu organisacion internacional di labor, lo garantisa cu nos leynan y regulacion local ta cumpli cu standard y norma internacional cu ta garantisa maximo proteccion di nos empleadonan.
E mandatario ta na altura si cu no ta tur politico ta pensa mesun cos. Pero for di su maneho, e ta sinti cu colaboracion internacional ta na beneficio di nos hendenan.
Ta recien ainda cu e mandatario a reuni cu director di International Labour Organization (ILO) p’e sector di Caribe. Durante e reunion, a intercambia pensamento y vision p’un miho maneho laboral. ILO a garantisa e mandatario cu por conta cu nan sosten na tur momento. A comparti cu e mandatario cu Aruba por aplica riba sosten tecnico p’asina yuda nos fortifica nos leynan y maneho di labor.
Ya e mandatario a manda tres peticion p’asina ricibi sosten tecnico pa diferente desaroyo cu e ta bezig cu ne. Entre otro, sosten p’un introduccion di ‘Arbowet’. E proceso lo cana su caminda pero ya a inicia e combersacionnan pa intercambia expertisio. Tambe a haci un peticion pa ricibi sosten pa ora tin un disputa laboral. Por pensa riba un corte aboral, un corte di mediacion caminda por yuda soluciona conflicto entre e trahado y e dunado di trabou. Ta algun herment cu ta contribui n’e bienester di nos hendenan.
Locual ta importante pa Minister Cicilia ta cu nos ley- y manehonan di labor ta cumpli cu e standard y norma internacional. Ey ta caminda cu ILO tin un rol pa yuda Aruba. Asina cu ricibi e prome draft, por spera adaptacion y mehoracion den maneho p’asina garantisa e proteccion necesario.
