Minister Dangui Oduber: Aruba a baha e cantidad di casonan activo bao di 300 (287) y 0 patent den ICU

Minister Dangui Oduber ta hopi satisfecho con e situacion di Covid-19 ta na e momentonan aki. Esey no ta kita cu nos tur mester keda cu nos focus y disciplina.

Desde 4 augustus 2020 y pa varios simannan e second wave a bin duro y cu hopi forsa. E tawata simannan pisa cu hopi tension pa Aruba y no tawata facil pa ningun di nos. Nos a mantene focus y cu curashi y determinacion nos a bin cu un strategia y a pone metanan concreto nos dilanti.

E strategia tawata dirigi pa reduci e cantidad di contagio nan mas lihe posibel. Banda di esaki nos a bisa cu nos lo preveni y combati cluster.

E metanan cu nos a pone nos dilanti tabata:

Reduci e cantidad di personanan cu ta wordo interna pa Covid-19 na HOH.

Percura pa nos por mantene nos capacidad di ICU.

Percura pa nos reactiva reguliere y electieve zorg.

Reenforsa departamento di salud publico.

Reenforsa e team pa bron en contacten onderzoek.

Reenforsa e team pa control riba isolacion.

Introduci multa pa esunnan cu no mantene nan mes na protocol.

Reenforsa e team di task froce bedrijven pa mas control riba negoshinan.

Baha e cantidad di casonan positivo pa dia na un averahe di 30 caso of menos.

Baha e cantidad di casonan activo bao di 400 caso activo.

Cu e strategia aki y hunto cu e metanan cu nos a pone nos dilanti nos a tuma tur e decisionnan necesario pa por ehecuta nos strategia y logra e metanan. Banda di esaki nos a tuma varios medida necesario pa nos por logra controla y maneha e situacion miho.

Awe nos por ta satisfecho cu e resultado di nos strategia y metanan. Awe nos a logra baha e cantidad di casonan positivo pa dia rond di un averahe di 19 caso positivo pa dia. Nos a logra baha a cantidad di casonan activo te na 287 caso activo.

Esaki ta un esfuerso di tur hende cu no ta biba riba e pais aki. Tur hende cu a sigui e protocolnan y a mantene nan mes na disciplina. For di un averahe di 141 caso nobo pa dia awor nos ta rond di 19 caso nobo pa dia. Di 1600 caso activo 4 siman pasa awe nos ta bao di 300 caso activo y nos ta na 287 caso activo. Sigur, esaki ta trece un tiki alivio cun’e pa nos tur considerando cuanto caso activo nos tawata tin na cierto momento y tambe cuanto caso positivo a wordo registra na Aruba.

E positivity rate tambe ta bahando

Awe hospital tin 5 persona riba afdeling y 0 den ICU pa prome biaha despues di hopi simannan.

E resultado aki NO a bin di su mes, Esaki ta resultado di un esfuerso en conhunto; di medidanan tuma pa e Crisis team di Gobierno y nos Pueblo cu a coopera pa adopta un actitud cu mas disciplina pa sigui e reglanan pa combati e virus y evita cu ta sigui plama. Sin lubida esunnan cu ta traha den cuido cu a haci un excelente trabou, masha danki na boso commitment y esfuerso.

E situacion unda nos a yega aki ta bisa nos cu e ta costa hopi dia, hopi esfuerso, hopi placa y hopi cupo di trabao pa contene e virus, scapa bida y scapa sufrimento.

Sinembargo pa e plama y bira un menasa pa nos poblacion specialmente pa esunnan mas vulnerabel y tambe perhudica nos bienestar, e por tuma dies un descuido di un of mas hende.

Nos mester realisa cu E virus aki ta bay keda pa algun tempo mas. Nos mester sigui mantene consistentemente e cantidad di casonan di infeccion abao y stabil bao di 30 caso of menos pa dia. Esaki ta e unico manera pa scapa bida y percura la economia por draai. Loke nos a haci pa baha e cantidad, mester bira nos custumber, e actitud cu disciplina y respet pa otro mester bira normal.

Nos ta bibando temponan remarcabel cu nos mester pensa mas profundo kico e Calamidad aki ta bisando nos.

E clave ta: Mester sigui actua cu respet y disciplina pa cuida bo mes y otronan, ora cu tur hende haci mescos, nos tur ta cuida otro! Esey ta e clave por mantene e balansa. Como comunidad nos mester ta UNI y actua UNI pa vence e Covid-19 y cuminsa recupera nos bienestar y futuro.

E reglanan di laba man frecuentemente, no mishi cu man na bo cara sin cu bo a laba man prome segun e regla, mantene distancia aunke bo tin tapa boca bisti, bisti bo tapa boca na tur luga paden, tosa den bo brasa y no den bo man. Wak cu kico bo ta mishi y laba bo man despues. Den bo auto percura pa bo tin hand sanitizer. Haci menos bishita, no mas cu 6 hende. Cada un di boso mantene distancia di otro.

Nos ta na otro crusada importante. Nos a logra reduci e contagio nan na un nivel aceptabel. Nos a cuminsa suavisa medidanan. Esaki no kiermen nos mester bay celebra, al contratio nos mester ta mas gefocused cu nunca pa loke a sosode cu e second wave no ripiti su mes. Esaki kiermen cu si nos mantene disciplina nos por cuminsa recupera nos economia y turismo mas lihe. Nos ta bay drenta high season, e temporada di mas importante pa Aruba su economia.

Descuido di nos comportacion lo conduci na aumento di casonan, aumento di casonan lo conduci na medidanan y esaki lo conduci na menos entrada, menos trabou y consecuencianan serio pa salud mental.

Nos kier sigui biba, pero pa sigui biba nos tur mester ta consciente cu e mester ta otro tanten e vacuna no yega. Mi ta convenci cu nos por, Aruba su pueblo ta un pueblo resiliente. Hunto nos por control’e y Uni nos ta vence.

Aruba ta conta cu bo!