Diamars dia 27 di September a celebra World Tourism Day y na mesun momento tambe a celebra Cruise Tourism Industry, cual ta un parti importante den e industria di turismo. Minister di Turismo y Salud Publico, Sr. Dangui Oduber, a inaugura e “Cruise Tourism Symposium” diamars atardi na Marriott Ballroom.

Durante e symposium aki tabata tin diferente presentacion cu a tuma luga cu un grupo diverso di expertonan di Aruba pero tambe internacional. Tin diferente invitado a bin for di Europa pa asisti e “Aruba meets Europe conference” y na mesun momento tabata presente pa e symposium di crucero.

Aruba su industria di crucero a restart na Juni di 2021 y ta premira un recuperashon di 80% pa final di aña 2022. Consequentemente, Aruba tabata parti di un di e prome destinacionan den Caribe pa cruceronan saliente for di Merca. Agregando na esaki, recientemente e proyecto di Port City a wordo anuncia cual ta un inversion di 500 miyon cu lo percura pa eleva e calidad turismo crucero y tambe atrae mas turista.

E strategia pa cu e industria aki ta pa pais Aruba haña mas entrada por medio di e turista crucero cu ta inverti ora cu nan baha na Aruba. Den e vision di turismo crucero tambe tin e 4 puntonan cardinal cu lo enfoka riba dje den e siguiente añanan. Esakinan ta turismo sostenibel, desaroyo di isla Aruba, innovacion y un isla cu ta rico den data pa por evalua y sigui hasi plan y proyecto nan pa eleva e calidad di producto Aruba y locual nos ta ofrece.

Tambe mester menciona cu den 2023 tin diferente liña di curucero cu lo cuminsa yega na e port di Aruba, entre otro Silversea y Seabourn, Virgin Cruises, Ritz Carlton Yacht Collection y tambe Explora Journeys. Tur esakinan ta parti di e plan strategico pa diversifcia turismo crucero y crea mas entrada pa pais Aruba.

Turismo crucero ta un parti importante di Aruba su plan di turismo y economia. Sr. Oduber ta gradici tur stakeholders cu a hasi nan esfuerzo pa e evento aki, creando un espacio caminda cu por a intercambia diferente idea y adkiri hopi informacion. Un danki ta bay specialmente na Aruba Tourism Authority, cu semper ta principal den fortifica relacionan y ejecuta e vision di turismo pa Aruba.

LEAVE A REPLY

Please enter your comment!
Please enter your name here